पुणे: अहमदाबाद विमान दुर्घटनेमुळे पुण्यातील भारतीय जनता पक्ष व काँग्रेस यांचे कार्यक्रम रद्द करण्यात आले. गुजरातमध्ये गुरुवारी सकाळी हा भीषण अपघात झाला. त्याची दखल घेत कार्यक्रम रद्द करण्यात आले. विमान दुर्घटनेत २४२ प्रवाशांनी किंवा गमावला आहे. या दुर्दैवी घटनेचा शोक व्यक्त करत सर्व पक्षाच्या पदाधिकाऱ्यांनी कार्यक्रम, मोर्चे रद्द केले आहेत.
पंतप्रधान नरेंद्र मोदी यांच्या ११ वर्षांच्या कार्यकाळाची माहिती देण्यासाठी केंद्र सरकारने देशातील सर्व राज्यांमधील मोठ्या शहरांमध्ये केंद्रीय मंत्र्यांसह स्थानिक पदाधिकाऱ्यांच्या पत्रकार परिषदांचे आयोजन केले होते. पुण्यात गुरुवारी दुपारी पक्ष कार्यालयात पक्षाचे राष्ट्रीय महामंत्री अरुण सिंह तसेच राज्याचे सांस्कृतिक मंत्री आशिष शेलार यांची पत्रकार परिषद होणार होती. मात्र, विमान अपघाताची माहिती समजल्यानंतर भाजपने देशातील या सर्व पत्रकार परिषदा रद्द करण्याचा निर्णय जाहीर केला. त्यानुसार पक्षाचे शहराध्यक्ष धीरज घाटे यांनी पक्ष कार्यालयात उपस्थित राहून ही पत्रकार परिषद रद्द केली असल्याचे सांगितले. शेलार यांच्या उपस्थितीतील अन्य कार्यक्रमही रद्द करण्यात आले असल्याचे त्यांनी सांगितले.
काँग्रेसने राज्यात सर्वत्र मशाल मोर्चाचे आयोजन केले होते. राज्याच्या विधानसभा निवडणुकीमध्ये गैरप्रकार झाल्यासंबंधी पक्षाचे नेते राहुल गांधी यांनी जाहीर आरोप केले होते. त्याविषयी जनजागृती करण्यासाठी हे मशाल मोर्चे होते. पुण्यातील मोर्चा शनिवारी (दि.१४ जून ) आयोजित केला होता. तो रद्द केला असल्याचे पक्षाच्या वतीने कळवण्यात आले. मोर्चाची पुढील वेळ नंतर जाहीर करण्यात येणार आहे, असे सांगण्यात आले.