देहूरोड : संत तुकाराम महाराज यांच्या पालखीचे बुधवारी श्रीक्षेत्र देहूतून प्रस्थान झाल्यानंतर, वारी सोहळ्यात सहभागी होणाऱ्या अनेक दिंड्यांना देहू परिसरात मुक्कामासाठी जागा उपलब्ध न झाल्याने त्या चिंचोली आणि झेंडेमळा परिसरात येत आहेत. देहूरोड कॅन्टोन्मेंट प्रशासन आणि स्थानिक ग्रामस्थांकडून वारकऱ्यांच्या स्वागतासाठी आणि भोजन व्यवस्थेसाठी तयारी सुरू आहे.
चिंचोलीत शनी-पादुका मंदिर परिसरात विसावा
रविवारी पालखी चिंचोलीतील शनी-पादुका मंदिराजवळ दुपारच्या विसाव्यासाठी थांबणार आहे. त्या ठिकाणी दर्शन व्यवस्था, स्वच्छता, वीजपुरवठा आणि इतर आवश्यक सुविधा पूर्ण करण्यात आल्या आहेत. देहूरोड कॅन्टोन्मेंट बोर्डाच्या वतीने चिंचोली येथील विसाव्याच्या ठिकाणासह आजूबाजूच्या परिसरात मोठ्या प्रमाणात स्वच्छता मोहीम राबवण्यात आली आहे. तसेच देहूरोड लष्करी भाग, मोकळे गायरान, खेळाची मैदाने, झेंडेमळा, अशोकनगर आणि महामार्गालगत गवत, झाडाझुडपं आणि अडथळा ठरणाऱ्या फांद्या हटवल्या आहेत. रस्त्याच्या बाजूला पडलेला राडारोडादेखील साफ करण्यात आला आहे. पालखी मार्ग सुशोभित आणि व्यवस्थित करण्यात आला आहे.
ग्रामस्थांकडून वारकऱ्यांच्या सेवेसाठी पुढाकार
चिंचोली ग्रामस्थांनी वारकऱ्यांच्या निवास, आंघोळ, नाश्ता, भोजन आणि विश्रांतीची व्यवस्था केली आहे. काही कुटुंबांनी आपली घरे वारकऱ्यांसाठी खुली केली असून, कोणत्याही प्रकारची गैरसोय होऊ नये यासाठी ग्रामस्थ सतर्क आहेत. संत तुकाराम महाराज पालखी सोहळ्याच्या पार्श्वभूमीवर देहूरोड, चिंचोली आणि झेंडेमळा परिसरात वारकऱ्यांच्या स्वागतासाठी सज्जता पूर्ण झाली आहे. स्थानिक प्रशासन, ग्रामस्थ आणि स्वयंसेवी संस्था मिळून वारीची परंपरा, स्वच्छता आणि सेवा यांचे उत्तम उदाहरण सादर करत आहेत.