पुणे: आयटीत काम करणाऱ्या २८ वर्षीय तरुणाला पार्टी करून घरी जात असताना रविवारी मध्यरात्री तिघांनी मारहाण करत लुटले. त्याला एटीएम सेंटरमध्ये घेऊन जात पैसे काढायला लावले. त्याचबरोबर त्याचा मोबाइल आणि घड्याळ असा १ लाख ३५ हजार रुपयांचा ऐवज जबरदस्तीने हिसकावून नेला. याप्रकरणी जॉन्सन जॉन पिल्लई (२८, रा. सिंद हिंद सोसायटी, लुल्लानगर, वानवडी) यांनी मुंढवा पोलिस ठाण्यात फिर्याद दिली आहे. त्यानुसार तीन जणांविरोधात गुन्हा दाखल करण्यात आला आहे. ही घटना ८ ऑक्टोबर रोजी मध्यरात्री सव्वा एक ते दोनच्या सुमारास रागा लॉन्स, एबीसी रोड आणि पिंगळे वस्ती येथे घडली.
याप्रकरणी पोलिसांनी दिलेल्या माहितीनुसार, फिर्यादी डॉन्स पिल्लई हे पार्टी घरून घरी निघाले होते. त्यावेळी आरोपी हे दुचाकीवरून त्यांच्याजवळ आले. त्यांनी जॉन्सन यांना रिक्षा पाहिजे का असे विचारले असता, त्यांनी नकार दिला. त्यानंतर आरोपींनी जॉन्सन यांना थेट मारहाण करत पैशांची मागणी केली. त्यानंतर जबरदस्तीने आरोपींनी पिंगळे वस्ती येथील एका एटीएम सेंटरमध्ये जॉन्सन यांना नेत त्यांच्या एटीएम कार्डद्वारे तीन ते चार वेळा २०-२० हजार रुपये काढून घेतले. त्यानंतर त्यांचा मोबाइल आणि हातातील घड्याळ असा १ लाख ३५ हजाराचा हिसकावून घेत तेथून पळ काढला. यानंतर जॉन्सन पिल्लई यांनी पोलिस ठाण्यात धाव घेतली. याप्रकरणाचा पुढील तपास पोलिस उपनिरीक्षक खेडकर करत आहेत.