नीरा (पुणे) : नीरा (ता. पुरंदर) येथे अल्पवयीन मुलीवर बलात्कार केल्याप्रकरणी एका शिक्षकाला पोलिसांनी जेरबंद केले आहे. त्याच्या विरोधात त्याच्याकडेच शिकवणीसाठी येणाऱ्या एका अल्पवयीन मुलीने जेजुरी पोलिसांत फिर्याद दिली आहे. तर, त्या खासगी शिकवणीच्या शिक्षकाला पोलिसांनी ताब्यात घेतले आहे.
याबाबत मिळालेल्या माहितीनुसार नीरा (ता. पुरंदर) वाॅर्ड नंबर एकमध्ये ज्ञानदीप कोचिंग क्लासेसमध्ये शिकवण्याचे काम करणाऱ्या सुनील चव्हाण यांच्या विरोधात फिर्याद देण्यात आली आहे. त्याच्यावर बलात्कार व बाल लैंगिक अत्याचार प्रतिबंधक कायद्यानुसार गुन्हा दाखल करण्यात आला आहे. पीडित मुलगी ही त्याच्या खासगी शिकवणीत शिकण्यासाठी जात होती. त्याने प्रथम पीडित मुलीला लग्नाचे आमिष दाखवले. दि.१ मे २०२३ रोजी दुपारी १ वाजल्यानंतर ज्ञानदीप कोचिंग क्लासच्या आतील खोलीमध्ये आरोपीने पीडित मुलगी अल्पवयीन आहे हे माहीत असताना, तू मला आवडतेस, माझे तुझ्यावर खूप प्रेम आहे, आपण लग्न करू असे म्हणून जवळ ओढून घेऊन विनयभंग केला. त्यानंतरही त्याने असे कृत्य तिच्यासोबत वेळोवेळी केले.
त्यानंतर साधारण ८ दिवसांनी क्लास संपल्यावर साधारणता दुपारी १ वाजल्यानंतर आरोपी सुनील चव्हाणने तिला कोचिंग क्लासेसच्या सर्व मुली निघून गेल्यानंतर थांबवून घेतले व तिला शिकवण्याची रूम सोडून दुसऱ्या रूममध्ये नेऊन जवळ घेऊन तिच्या इच्छेविरुद्ध जबरदस्तीने अत्याचार केला. त्यावेळी पीडित मुलीने असे करू नका म्हणून विरोध केला. परंतु त्यांनी तिचे काहीएक न ऐकता तिच्या सोबत जबरदस्तीने शारीरिक संबंध ठेवले. त्यानंतरही त्यांनी तिला नापास करण्याची धमकी देऊन तिच्यासोबत इच्छेविरुद्ध जबरजस्तीने शारीरिक संबंध ठेवले. सोमवारी रात्री याबाबतची जेजुरी पोलिसांत तक्रार देण्यात आली आहे. याबाबतचा अधिकचा तपास पोलिस निरीक्षक बापूसाहेब सांडभोर यांच्या मार्गदर्शनाखाली जेजुरी पोलिस स्टेशनचे सहायक पोलिस निरीक्षक मनोज नवसारे करीत आहेत.