नाशिकमधून हरवलेल्या ४ अल्पवयीन मुली पुण्यात सापडल्या

या चौघीही नाशिक रेल्वे स्थानकात रेल्वेगाडीत बोलत थांबल्या होत्या. त्याचवेळी ही रेल्वे सुटल्याने त्यांना खाली उतरता आले नाही...

ठळक मुद्देअपहरण झाल्याचा होता संशय; वडील रागावल्याने घरातून पलायन

पुणे : नाशिकमधून शुक्रवारी (दि. २३) रात्री आठच्या दरम्यान अपहरण झाल्याचा संशय असलेल्या १३ ते १५ वर्षांच्या ४ अल्पवयीन मुली स्वत:हून घरातून निघून गेल्याचे निष्पन्न झाले आहे. या मुली बंडगार्डन पोलिसांना शनिवारी (दि. २४) सायंकाळी साडेचारला पुणेरेल्वे स्थानकावर मिळाल्या. यातील एकजण वडिलांनी रागावल्याने घरातून निघून आली होती तर उर्वरित तिघी तिला समजण्यासाठी आल्या होत्या. 
         या चारही मुली सातवी-आठवीत शिकत आहेत. कोमल मूनचून सिंग (वय १३, रा. रोशनी अपार्टमेंट, जयभवानी रस्ता, नाशिक), तमन्ना श्रीचंद राजोलिया (वय १४, रा. गजानन हाईट्स, जयभवानी रस्ता, नाशिक), पलक अमोल आवारे (वय १४) व भूमी विजय गायकवाड (वय १५, दोघीही रा. हरिदर्शन सोसायटी, जयभवानी रस्ता, नाशिक) अशी घरातून बेपत्ता झालेल्या मुलींची नावे आहेत. याप्रकरणी कोमलची आई अनितादेवी मूनचून सिंग (वय ३६) यांनी शुक्रवारी मुलींचे अज्ञात व्यक्तीने अपहरण केल्याची तक्रार दिली होती. त्यानंतर नाशिक पोलिसांनी या मुलींचे वर्णन, छायाचित्रे व मोबाईल क्रमांक इतर जिल्ह्यातील पोलिसांना पाठवले. तसेच या मुलींच्या मोबाईलवरून त्या शनिवारी दुपारी साडेतीनला पुणे रेल्वे स्थानक परिसरातील पार्सल विभागाजवळ असल्याचे समजले. त्यामुळे नाशिक पोलिसांनी याबाबत बंडगार्डन पोलिसांना कळवले. या पोलिस ठाण्याच्या दामिनी पथकातील नाईक यास्मिन खान व सारिका सोनवणे यांनी शोध घेतला असता, या मुली त्याठिकाणी आढळल्या नाहीत. या मुलींचा शोध घेत असताना साडेचारच्या सुमारास त्यांचे 'मोबाईल फोन लोकेशन' फलाट क्रमांक चारवर दाखवण्यात येत होते. खान व सोनवणे यांनी त्याठिकाणी तपास केला असता या मुली तेथे आढळून आल्या. या मुलींना ताब्यात घेऊन बंडगार्डन पोलिस ठाण्यात आणण्यात आले. कोमल सिंगला किरकोळ कारणावरून वडील रागावले होते. त्यामुळे ती घरातून निघून आली. तर उर्वरीत तिघी तिच्या मैत्रिणी आहेत. या तिघी कोमलला असे न करण्याबाबत समजावत होत्या. या चौघीही नाशिक रेल्वे स्थानकात रेल्वेगाडीत बोलत थांबल्या होत्या. त्याचवेळी ही रेल्वे सुटल्याने त्यांना खाली उतरता आले नाही. या रेल्वेने त्या कल्याणला पोहचल्या. याठिकाणी उतरल्यावर त्यांनी पुण्याकडे येणारी रेल्वे पकडली. या गाडीने शनिवारी दुपारी बाराच्या सुमारास त्या पुण्यात पोहचल्या. या मुलींना ताब्यात घेतले तेव्हा त्या खूप घाबरलेल्या, उपाशी व रात्रभर न झोपल्याने त्यांची अवस्था केविलवाणी झाली होती, असे यास्मिन खान यांनी सांगितले. या मुली सापडल्याबाबत नाशिक पोलिस व त्यांच्या पालकांना कळवण्यात आले आहे.