पुणे: कोरोनानंतर शहरातील इयत्ता पाचवी ते आठवीच्या शाळा सुरू झाल्या असून, पहिल्याच दिवशी 786 पैकी 283 शाळांची घंटा वाजली. त्यातही सुरू होणा-या शाळांमध्ये खासगी शाळा अधिक असून पेठांमधील शाळांमध्ये विद्यार्थ्यांची उपस्थिती चांगली असल्याचे दिसून आले. पालिकेने 348 शाळांची तपासणी केली असली,, तरी सर्व शाळा सुरू झाल्या नाहीत. इंग्रजी माध्यमाच्या अनेक शाळा आठवडा भरात सुरू होणार आहेत.
कोरोनाच्या पार्श्वभूमीवर बंद असलेल्या शाळा जानेवारी महिन्यात सुरू करण्यास राज्य शासनाने परवानगी दिली. मात्र, पुणे महापालिका प्रशासनाने 1 फेब्रुवारीपासून शहरातील शाळा सुरू करण्यास मान्यता दिली. त्यासाठी शासनाने दिलेल्या नियमावलीचे काटेकोर पालन करण्याचे बंधन शाळांना घालण्यात आले. तसेच शिक्षकांची कोरोना तपासणी केल्या शिवाय शाळा सुरू करणे शक्य नसल्याने पालिकेच्या व खासगी शाळांमधील शिक्षक कोरोना तपासणी करून घेत आहेत. शहरातील नववी ते बारावीपर्यंतच्या शाळा व कनिष्ठ महाविद्यालयांमधील उपस्थितीत दिवसेंदिवस वाढ होत आहे. त्यामुळे पाचवी ते आठवीच्या शाळांना विद्यार्थ्यांकडून प्रतिसाद मिळत आहे.
भावे हायस्कूल, रमणबाग, गरवारे, नूमवि, महेश विद्यालय आदी शाळांमध्ये विद्यार्थ्यांची उपस्थिती चांगली होती. महेश विद्यालायातील नववी ते बारावीपर्यंतच्या विद्यार्थ्यांनी शाळेत आलेल्या पाचवी ते आठवीच्या विद्यार्थ्यांचे पुष्पगुच्छा व खाऊ देऊन स्वागत केले. तब्बल दहा महिन्यांनंतर शाळा सुरू होणार असल्याने विद्यार्थ्यांमध्ये उत्साहाचे वातावरण असल्याचे दिसून आले. शाळांनी सुध्दा सॅनिटायझर, स्वच्छता व फिजिकल डिस्टंन्सिंगच्या नियमांचे पालन करून विद्यार्थ्यांना शाळेत प्रवेश दिला.
------------------------------------
पालिका हद्दीतील सुरू झालेल्या शाळांची विभागनिहाय आकडेवारी
विभागाचे नाव मनपा शाळा खासगी शाळा.
सिंहगड रस्ता ४ १२
ढोले-पाटील रस्ता १ ६
घोले रस्ता ४ ११
नगर रस्ता ११ १६
भवानी पेठ १३ १
विश्रामबागवाडा ० ११
वारजे-कर्वेनगर ० ३
हडपसर ० १४
कोथरूड २ ८
कात्रज १३ २७
येवलेवाडी ३ २३
बिबवेवाडी १९ २१
औंध २५ २६
वानवडी-रामटेकडी ११ २