पुणे, दि. 9 - पिंपरी चिंचवडमध्ये 17 गाड्यांची तोडफोड करण्यात आली आहे. चिंचवडगावात टोळक्याने धुडगूस घालत वाहनांची तोडफोड केली आहे. तोडफोडीत 17 गाड्याचं प्रचंड नुकसान झालं आहे. गुरुवारी रात्री साडेदहाच्या सुमारास ही घटना घडली आहे. मंगलमूर्तीवाडा परिसरात टोळक्याने धुडगूस घालत गाड्या फोडल्या. घटनेची माहिती मिळाल्यानंतर चिंचवड पोलीस घटनास्थळी दाखल झाले होते.
दोन गटातील वादातून वाहनांची तोडफोड झाल्याचं समोर आलं आहे. याप्रकरणी चिंचवड पोलिसांनी विकी घोलप गटाच्या सात जणांना ताब्यात घेतलं आहे. परिसरात सध्या दहशतीचं वातावरण आहे.
या घटनेमध्ये रिक्षा, कार, टेम्पो अशा वाहनांची लाकडी दांडके आणि दगडाच्या सहाय्याने तोडफोड करण्यात आल्याची माहिती मिळाली आहे. घटनेची माहिती मिळाल्यानंतर पोलिसांनी घटनास्थळी पोहोचून तपासाला सुरुवात केली होती. प्राथमिक माहितीवरून दोन टोळक्यातील भांडणातुन ही तोडफोड करण्यात आल्याचं समोर आलं होतं. विकी घोलप गटाचा प्रशांत यादव यांच्या टोळीतील वादातून ही तोडफोड झाल्याचा प्राथमिक अंदाज वर्तविण्यात येत आहे.दरम्यान पोलिसांना कारवाई करत विकी घोलप गटातील सात जणांच्या मुसक्या आवळल्या आहेत.