“हिंमत असेल तर मला अडवून दाखवा”; भाजपा आमदाराच्या गाडीवर हल्ला, बुलडाण्यात वातावरण चिघळलं
By ऑनलाइन लोकमत | Published: April 19, 2021 05:33 PM2021-04-19T17:33:35+5:302021-04-19T17:37:31+5:30
Clashes Between Shivsena and BJP Over MLA Sanjay Gaikwad Controversial Statement on Devendra Fadnavis: तुझ्या मायनं दूध पाजलं असेल तर ५० मीटर माझ्या जवळ येऊन दाखव तुला संजय गायकवाड काय आहे ते दाखवतो अशी धमकी शिवसेना आमदार संजय गायकवाड यांनी दिली होती.
“हिंमत असेल तर मला अडवून दाखवा”; भाजपा आमदाराच्या गाडीवर हल्ला, बुलडाण्यात वातावरण चिघळलं
Next बुलडाणा – शिवसेना आमदार संजय गायकवाड यांनी राज्याचे विरोधी पक्षनेते देवेंद्र फडणवीस यांच्याबाबत आक्षेपार्ह विधान केले होते. यावरून शिवसेना-भाजपा कार्यकर्ते आमनेसामने आल्याचं पाहायला मिळत आहे. बुलडाण्यात माजी आमदार विजयराज शिंदे यांना मारहाण केल्याची घटना ताजी असतानाच दुसरीकडे आमदार संजय कुटे यांच्यावरही हल्ला झाल्याची माहिती आहे.(Shivsena MLA Sanjay Gaikwad Part workers attack on BJP Sanjay Kute Car in Buldhana)
आमदार संजय कुटे यांनी ट्विट करून सांगितले की, माझ्या गाडीवर बुलडाणा येथे आमदार संजय गायकवाड यांच्या कार्यकर्त्यांनी भ्याड हल्ला केला. आता मी संजय गायकवाड यांच्यासह त्यांच्या कार्यकर्त्यांवर गुन्हे दाखल होऊन त्यांना अटक होत नाही तोपर्यंत मी बुलडाणा शहर सोडणार नाही, मी परत बुलडाणा शहरात येतोय हिंमत असेल मला अडवून दाखवावे असा इशाराच त्यांनी शिवसेना आमदार संजय गायकवाड यांना दिला आहे. आमदार संजय कुटे हे विजयराज शिंदे यांना भेटण्यासाठी बुलडाण्यात गेले होते. त्यावेळी हा हल्ला झाला.
माझ्या गाडीवर बुलढाणा येथे संजय गायकवाड यांच्या कार्यकर्त्यांनी भ्याड हल्ला केला आता मी संजय गायकवाड यांच्यासह त्यांच्या कार्यकर्त्यांवर गुन्हे दाखल होऊन त्यांना अटक होत नाही तोपर्यंत मी बुलढाणा शहर सोडणार नाही, मी परत बुलढाणा शहरात येतोय हिम्मत असेल मला अडवून दाखवावे.
— Dr.Sanjay Kute- डॉ.संजय कुटे (@DrSanjayKute) April 19, 2021
संजय गायकवाड यांनी दिली होती धमकी
संजय कुटेसारखे आमदार दारू पिऊन वावरात पडलेले असतात. त्याला सर्व शौक आहे तो मवाली आहे. तुझ्या मायनं दूध पाजलं असेल तर ५० मीटर माझ्या जवळ येऊन दाखव तुला संजय गायकवाड काय आहे ते दाखवतो अशी धमकी शिवसेना आमदार संजय गायकवाड यांनी दिली होती.
माजी आमदार विजयराज शिंदेंनाही मारहाण
भाजपचे नेते तथा माजी आमदार विजयराज शिंदे १८ एप्रिल रोजी दुपारी चार वाजेच्या सुमारास जयस्तंभ चौकात शिवसेना आमदार संजय गायकवाड यांचा निषेध करण्यासाठी जमले होते. यावेळी गायकवाड यांचा पुतळा जाळण्याचा प्रयत्न केला असता यावेळी आमदार संजय गायकवाड यांचे पुत्र कुणाल गायकवाड व त्यांच्या सहकाऱ्यांनी त्यांना त्यास विरोध केला. दोन्ही गटात शाब्दिक बाचाबाची होऊन राडा झाला. त्यावेळी झालेल्या हाणामारीत तीन ते चार जण किरकोळ जखमी झाल्याची माहिती आहे. दरम्यान, पोलिसांच्या मध्यस्थीने प्रकरण निवळण्याचा प्रयत्न करण्यात आला.
फडणवीस व कुटे यांच्या पुतळ्याचे दहन
बुलडाण्यातील या घटनेनंतर शिवसेना कार्यकर्त्यांनी मोताळा आणि सिंदखेडराजा येथे विधानसभेचे विरोधी पक्षनेते देवेंद्र फडणवीस तर बुलडाण्यात भाजपचे माजी मंत्री संजय कुटे यांच्या पुतळ्याचे दहन केले. त्यामुळे सध्या शहरात वातावरण तणावपूर्ण असल्याचे चित्र आहे.
काय आहे प्रकरण?
आमदार संजय गायकवाड यांनी कोरोनासंदर्भात भाजपा करत असलेल्या राजकारणाविरोधात वक्तव्य केले. त्यावेळी त्यांनी ‘कोरोनाचे जंतू सापडले तर फडणवीसांच्या तोंडात टाकले असते’ असे वक्तव्य केले होते. सोबतच भाजपच्या नेत्यांवर सडकून टीका केली होती. त्यानंतर हे संपूर्ण राजकारण पेटले आहे.