मुंबई – पंढरपूर विधानसभेच्या पोटनिवडणुकीत भाजपाला यश मिळताना दिसत असल्याचं पाहताच विरोधकांनी सत्ताधारी आमदारांवर कुरघोडी करण्याचा प्रयत्न केला आहे. पंढरपूरात समाधान आवताडे यांचा विजय निश्चित मानला जात आहे. अद्याप मतमोजणी पूर्ण होऊन अधिकृत घोषणा बाकी आहे. तत्पूर्वी आवताडेंच्या घराबाहेर जल्लोष सुरू झाला आहे. या निवडणुकीत भाजपानं महाविकास आघाडीला मात दिली आहे.(BJP MLA Nitesh Rane Targted MVA Leaders over Pandharpur by Election Results)
या निवडणुकीच्या निकालावर आमदार नितेश राणेंनी थेट महाविकासच्या आघाडीच्या आमदारांना खुली ऑफर दिली आहे. नितेश राणेंनी ट्विट करत म्हटलंय की, पंढरपुर पोटनिवडणुकीमध्ये महाविकास आघाडीच्या मंत्र्यांनी आणि उपमुख्यमंत्र्यापर्यंत सगळे गल्ली गल्ली फिरले तरीही लोकानी नाकारले. हा महाविकास आघाडीच्या आमदारांना संदेश आहे. येणारा धोका समजा आणि एक पाऊल पुढे टाका. भाजपा हा एकच पर्याय आहे. महाराष्ट्राची जनता आमच्या बरोबर आहे असं ते म्हणाले आहेत.
चंदक्रांत पाटलांनीही साधला निशाणा
मंगळवेढा-पंढरपूरमध्ये भाजपाचा स्पष्ट विजय झाला आहे. वीज कनेक्शन कापणे, कोविड काळात अनेकांना पॅकेज नाही. पीकविमा नाही, त्यामुळे लोक निवडणुकीची वाट पाहत होते. राज्यातील जनतेच्या मनात महाविकास आघाडी सरकारविरोधात राग आहे. याची दखल राज्य सरकारला घ्यावी लागेल असं त्यांनी सांगितलं त्याचसोबत राष्ट्रवादी काँग्रेसचे प्रदेशाध्यक्ष जयंत पाटील यांचं नाव न घेता चंद्रकांत पाटलांनी टोला लगावला. पंढरपूरात करेक्ट कार्यक्रम झाला. दुसऱ्याचे शब्द वापरणं मला आवडत नाही. पंढरपूरमध्ये कार्यकर्ते नीट कामाला लागले तर काय होऊ शकतं हे दिसून आलं. तसेच प्रशांत परिचारक आणि समाधान आवताडे यांची घट्ट एकी झाल्याने हा निकाल लागला असल्याचं श्रेय चंद्रकांत पाटलांनी कार्यकर्ते आणि परिचारक आवताडे यांच्या एकीला दिलं.
पंढरपूरात भाजपाचा जल्लोष
भाजपा समर्थकांनी पंढरपूर पोटनिवडणुकीचा विजयी जल्लोष सुरू केला आहे. मात्र, अद्याप अधिकृत अंतिम निकाल जाहीर करण्यात आला नाही. मतमोजणी संथ गतीने सुरू असल्याने समाधान आवताडे केंद्रावर पोहोचले आहेत. राष्ट्रवादीसह भाजपानेही प्रतिष्ठेच्या केलेल्या पंढरपूर-मंगळवेढा विधानसभा पोटनिवडणुकीत चुरशीची लढत पाहायला मिळाली. मात्र, एकदा पिछेहाट झाल्यानंतर भगिरथ भालके हे शेवटपर्यंत आवताडेंची आघाडी तोडूच शकले नाहीत. भाजपानेही विजय निश्चित मानला असून भाजपाचे प्रवक्ते केशव उपाध्ये यांनी ट्विट करुन महाविकास आघाडीला लक्ष्य केलंय. मात्र अद्यापही विजयाची अधिकृत घोषणा झाली नाही. त्यामुळे, पंढरपूर मतमोजणी केंद्रावर संभ्रमावस्था दिसत आहे.