Supriya Sule Maharashtra Politics : केंद्रीय गृहमंत्री अमित शाह आणि कॅबिनेट मंत्री हसन मुश्रीफ यांच्या भेटीचा एक फोटो समोर आला आहे. या फोटोची सोशल मीडियावर चर्चा होत आहे. याच भेटीवरून आता सुप्रिया सुळेंनीअमित शाह आणि हसन मुश्रीफ यांच्यावर टीकेची तोफ डागली. त्या मुंबईत माध्यमांशी बोलत होत्या. (Supriya Sule demanded that Amit Shah should say that the allegations leveled against Hasan Mushrif were false)
सुप्रिया सुळे म्हणाल्या की, "किरीट सोमय्या अनेक वर्षांपासून एक मोठे फायटर आहेत. डर्टी डझन नावाची सीरिज त्यांनीच काढली. मी कधीच विसरले नाही. डर्टी डझन कुठे आहेत, हा एक मोठाच प्रश्न आहे. काल मी त्या डर्टी डझनपैकी एका माणसाचा फोटो अमित शाहांसोबत बघितला."
मुश्रीफ-शाह भेटीवर सुप्रिया सुळे काय बोलल्या?
"ज्यांना एका वर्षापूर्वी हे डर्टी डझन म्हणत होते, तेच डर्टी डझन अतिशय विनम्रपणे अमित शाहांना भेटले. मला कौतुक दोघांचंही वाटतं. अमित शाहांचंही वाटतं, कारण त्यांचा पक्ष त्यांना (हसन मुश्रीफ) डर्टी डझनपैकी एक म्हणत होता. मला गंमत त्या माणसाचीही वाटते, ज्याच्या बायकोला लढावं लागलं. त्यांच्या नातवडांना दूध मिळत नव्हतं. त्यांची बायको लढत होती. ज्यांनी ईडी तुमच्या घरी पाठवली. ते (हसन मुश्रीफ) त्यांना (अमित शाह) अभिवादन करत होते", अशी टीका सुप्रिया सुळे यांनी हसन मुश्रीफांवर केली.
सुप्रिया सुळे या भेटीवर बोलताना म्हणाल्या, "दोघांची विश्वासार्हता इथे पणाला लागली आहे. अमित शाहांना मला प्रश्न विचारायचा आहे की, ज्या माणसाच्या घरी तुम्ही ईडी पाठवली. ज्या माणसावर तुम्ही ईडी आणि सीबीआयच्या केसेस केल्या. त्या माणसाला डर्टी डझन तुमचा पक्ष म्हणत होता. मग तुम्ही त्याला हॅण्डशेक केलाच कसा?", असा सवाल सुप्रिया सुळेंनी अमित शाह यांना केला.
अमित शाहांनी टीव्हीवर सांगावं की मुश्रीफांवरील आरोप खोटा होता -सुप्रिया सुळे
"ती फाईल क्लिअर आहे का, मग भाजपाने आणि अमित शाहांनी टीव्हीवर येऊन सांगितले पाहिजे की, हो, मी जो हसन मुश्रीफांवर आरोप केला; तो खोटा होता. एवढं तरी त्यांनी (अमित शाह) खरं बोलावं. आणि हसन मुश्रीफांनीही त्यांना शेकहॅण्ड करताना आम्हाला सांगावं की, हो, हे अमित शाह आहेत. त्यांनी माझी माफी मागितली आहे. माझ्या घरावर हल्ला केला, माझ्या नातवंडांना दूध दिलं नाही. माझ्या बायकोच्या अश्रुंची किंमत अमित शाहांनी आमच्या घरात येऊन फेडली म्हणून मी त्यांना हॅण्डशेक करतोय", असे म्हणत सुप्रिया सुळेंनी हसन मुश्रीफांना लक्ष्य केले.