पिंपरी (पुणे) : वैष्णवीच्या मृत्यूनंतर तिच्याबाबत वाईट बोलले गेले. आरोप करणारे सूज्ञ आहेत. त्यांनाही मुले-बाळे असतील, एखाद्याच्या मुलीवरती असे बोलणे योग्य आहे का, असा सवाल वैष्णवीचे वडील अनिल कस्पटे यांनी केला. भावना व्यक्त करताना कस्पटे यांच्या अश्रूचा बांध फुटला.
न्यायालयात बुधवारी सुनावणी झाली. हगवणे यांच्या वकिलांनी बुधवारी अजब युक्तिवाद केला. आमच्याकडे पाच कोटींच्या गाड्या आहेत. आम्ही चाळीस लाखांच्या फॉर्च्यूनरसाठी कशाला छळ करू? वैष्णवीचे नको त्या व्यक्तीसोबत नको ते चॅट सुरू होते. वैष्णवीची टेंडन्सी सुसाइडची होती, असे वकिल म्हणाले.
याबाबत बोलताना वैष्णवीचे वडील अनिल कस्पटे भावनिक झाले, म्हणाले, 'माझी मुलगी तर गेलीच आहे, मेल्यानंतर तिच्याबाबत असे वाईट बोलू नये. लेकराचे नाव बदनाम करू नका. विशेष सरकारी वकील राज्य सरकारने नेमला त्याबद्दल सरकारचे धन्यवाद. आत्महत्या प्रकरणातील तीन आरोपींची न्यायालयीन कोठडीत रवानगी झाली आहे, त्यांना जामीन मिळू नये. तिघांना कठोर शिक्षा व्हावी. मुलीला न्याय मिळावा.'
सुपेकर यांच्याकडून अतिरिक्त कार्यभार काढला
हगवणे कुटुंबियांचे नातेवाईक विशेष पोलिस महानिरीक्षक (कारागृह सेवा सुधार विभाग, महाराष्ट्र) जालिंदर सुपेकर यांनी हगवणे कुटुंबास मदत केल्याचा आरोप आहे. त्यातच गुरुवारी गृह विभागाने सुपेकर यांच्याकडून नाशिक, छत्रपती संभाजीनगर आणि नागपूर कारागृह उपमहानिरीक्षकपदाचा अतिरिक्त कार्यभार काढला आहे.
फॉर्च्यूनर नाही दिली तर मी यांची हेक्टर पेटवून देईन
अनिल कस्पटे म्हणाले, फॉर्च्यूनर देण्याअगोदर मी एमजी हेक्टर ही गाडी बुक केली होती. त्यांनी वादावादी केली. मला फॉर्च्यूनर नाही दिली, तर मी यांची हेक्टर पेटवून देईन, असे सांगण्यात आले गाडी दिली नाही तर लग्न मोडेन, अशी धमकी दिली होती. चांदीच्या ताटाची, सोन्याची मागणी केली होती.
वैष्णवीचा पती, सासू, नणंदला न्यायालयीन कोठडी
वैष्णवी हगवणे आत्महत्या प्रकरणात सासू लता हगवणे, नणंद करिष्मा हगवणे आणि वैष्णवी यांचा पती शशांक हगवणे यांची न्यायालयाच्या आदेशानुसार १४ दिवसांच्या न्यायालयीन कोठडीत रवानगी करण्यात आली. या सुनावणीनंतर लता आणि करिष्मा यांनी जामिनासाठी अर्ज केल्याची माहिती समोर आली आहे. राजेंद्र आणि सुशील यांच्या पोलिस कोठडीचा निर्णय ३१ मेला होणार आहे.