पिंपरी : जुन्या पुणे-मुंबईमहामार्गावरून दुचाकीवरून जात असेलल्या दोन वृद्धांना एका कारने जोरात धडक दिली. या अपघातात दोघांचाही मृत्यू झाला आहे. ही घटना गुरुवारी (दि. १४) सकाळी पावणे अकरा वाजता गार्डन सिटी समोर देहूरोड-निगडी दरम्यान घडली. सागर नेताजी शिंदे (वय २९ , सिद्धार्थनगर निगडी) यांनी देहूरोड पोलीस ठाण्यात फिर्याद दिली आहे. त्यानुसार वाहन चालकावर गुन्हा दाखल करण्यात आला आहे.
शंकर सखाराम शिंदे (वय ८० ), नरसिमन गुंडराम (वय ८३ , दोघे रा. मामुर्डी, देहूरोड) अशी मृत्यू झालेल्यांची नावे आहेत. फिर्यादी यांचे चुलते शंकर शिंदे आणि त्यांचे मित्र नरसिमन हे दोघे दुचाकीवरून जुन्या पुणे-मुंबईमहामार्गावरून देहूरोड येथून निगडीला जात होते. गार्डन सिटी समोर आल्यानंतर आरोपीने कार भरधाव वेगात चालवून दुचाकीला पाठीमागून धडक दिली. त्यात दोघांचा गंभीर जखमी झाल्याने मृत्यू झाला.