पिंपरी : ‘आमच्या बहिणीचे आधार कार्ड तुम्ही घेतले आहे’, असे म्हणून आधार कार्डच्या बहाण्याने जवळ येत एकाच्या पॅन्टच्या खिशात हात घालून १५ हजार रुपये काढून घेण्यात आले, तसेच शिवीगाळ करून लाथाबुक्क्यांनी मारहाण करण्यात आली. ही घटना शुक्रवारी (दि. २०) मध्यरात्री तीनच्या सुमारास गांधीनगर येथील लोखंडे सभागृहाजवळ घडली.
याबाबत मोहम्मद शाहनवाज आफताब आलम (वय २३, रा. कदम चाळ, गांधीनगर, पिंपरी) यांनी संत तुकारामनगर पोलिस ठाण्यात फिर्याद दिली. त्यावरून पोलिसांनी आधी अनोळखींविरोधात गुन्हा दाखल केला होता. मात्र, काही तासांतच तीन संशयितांना शोधून अटक केली.
दिनेश बाळू मंडपे (३३, रा. साई अपार्टमेंट, पिंपरी), संतोष रामकंपा (३०, रा. छत्रपती शाहू हौसिंग सोसायटी) व प्रबुद्ध सुरेश रोकडे (२३, रा. आर-३, आदर्शनगर, पिंपरी), अशी त्यांची नावे आहेत.
पोलिसांनी दिलेल्या माहितीनुसार मोहम्मद शाहनवाज आलम यांचा बंधू पिंपरी रेल्वे स्टेशनला घरातून निघाले होते. ते गांधीनगर येथील लोखंडे सभागृहाजवळ आले असता संशयित त्यांच्याजवळ आले. ‘आमचे बहिणीचे आधारकार्ड तुम्ही घेतले आहे’, असे म्हणून म्हणत मोहम्मद यांच्या खिशात हात घालून १५ हजार काढून घेतले, तसेच त्यांना मारहाण करून पळून गेले.