पिंपरी : महापालिका निवडणुकीच्या पार्श्वभूमीवर पिंपरी-चिंचवडमध्ये महायुतीतील घटक पक्षांतील जागा वाटपाचा तिढा वाढत चालला आहे. भाजप, शिंदे सेना आणि राष्ट्रवादी काँग्रेस (अजित पवार गट), रिपाइं (आठवले गट) यांच्यातील चर्चांना वेग आला असला तरी प्रत्येक पक्षाने आपापल्या बालेकिल्ल्यांवर ठाम दावा केल्याने वाटाघाटी गुंतागुंतीच्या बनल्या आहेत.
महापालिकेच्या २०१७ मधील निवडणुकीत भाजपने १२८ पैकी ७७ जागा जिंकत एकतर्फी वर्चस्व मिळवले होते. राष्ट्रवादीला ३५ जागा मिळाल्या होत्या, तर शिवसेनेला नऊ जागांवर समाधान मानावे लागले होते. त्या विजयाच्या जोरावर भाजपने यंदा सर्व प्रभागांत लढणार असल्याचा दावा केला आहे. दुसरीकडे शिंदे सेना आणि राष्ट्रवादीने प्रतिष्ठेचे, बालेकिल्ल्यांचे प्रभाग मिळावेत, असा आग्रह धरला आहे. त्यामुळे जशा निवडणुका जवळ येतील, तशी चढाओढ वाढणार आहे. राजकीय गणिते बदलल्याने उमेदवार निवड किचकट
पिंपरी-चिंचवडमध्ये कामगार ते आयटी प्रोफेशनल, तरुण मतदार ते ज्येष्ठ नागरिक, गावठाण ते नव्या गृहप्रकल्पांतील नागरिक असा मतदार आहे. राष्ट्रवादी आणि शिवसेनेत पडलेली फूट, नवी आरक्षण सोडत यामुळे स्थानिक राजकीय समीकरणे मोठ्या प्रमाणावर बदलली असून काही पारंपरिक प्रभाग महिलांसाठी, अनुसूचित जातींसाठी किंवा इतर मागासवर्गीयांसाठी राखीव झाल्याने उमेदवारांच्या निवडीची प्रक्रिया पुन्हा सुरू झाली आहे. या बदलांचा परिणाम महायुतीच्या जागावाटप चर्चेवर दिसून येत आहे.
राष्ट्रवादी-शिंदे सेनेला सत्ता सहभागाचा आधार
स्थानिक नेत्यांचे प्रभावक्षेत्र, गटबाजी तसेच चिंचवड, आकुर्डी, भोसरी, सांगवी, पिंपळे सौदागर या भागांतील सामाजिक गणित लक्षात घेऊन प्रत्येक पक्ष आपापली बाजू भक्कम करण्याचा प्रयत्न करत आहे. राष्ट्रवादीचा अजित पवार गट मात्र मोठे दावे करत आहे. शहरातील काही भागात राष्ट्रवादीचे पारंपरिक, सामाजिक व स्थानिक नेटवर्क अजूनही मजबूत आहे. त्यामुळे या प्रभागांमध्ये २०१७ चे निकाल कमजोर असले तरी २०२५ मध्ये नवीन गणित उभे राहू शकते, असा पक्षाला विश्वास आहे. शिंदे सेनेने राज्यातील सत्ता सहभागाचा आधार घेत काही प्रतिष्ठेच्या जागांची मागणी केली आहे. रिपब्लिकन पक्षानेही (आठवले गट) १५ जागांवर दावा सांगितला आहे.
जागा वाटपाचा अंतिम फॉर्म्युला
महायुतीकडून आगामी काही दिवसांत अंतिम जागावाटपाचा फॉर्म्युला जाहीर केला जाण्याची शक्यता आहे. मात्र मित्रपक्षांच्या मागण्या, संघटनात्मक दबाव आणि स्थानिक समीकरणे लक्षात घेतली तर वाटाघाटी अजून काही काळ लांबतील, अशी चर्चा आहे. निवडणुकीपूर्वी महायुतीचा अंतिम निर्णय कोणत्या दिशेने झुकतो, याकडे सर्वांचे लक्ष लागले आहे.
Web Summary : Pimpri-Chinchwad's ruling alliance faces seat-sharing challenges ahead of municipal elections. Each party insists on key areas, complicating negotiations. Political shifts and reservation changes add complexity. All eyes are on the final decision.
Web Summary : पिंपरी-चिंचवड में नगरपालिका चुनावों से पहले सत्तारूढ़ गठबंधन को सीट बंटवारे की चुनौतियों का सामना करना पड़ रहा है। प्रत्येक पार्टी प्रमुख क्षेत्रों पर जोर दे रही है, जिससे बातचीत जटिल हो रही है। राजनीतिक बदलाव और आरक्षण परिवर्तन जटिलता बढ़ाते हैं। सबकी निगाहें अंतिम निर्णय पर हैं।