- नारायण बडगुजर
पिंपरी : मुळशी तालुक्यातील भुकूम येथे पाकिस्तानी चलनातील नोट आढळली आहे. त्यामुळे खळबळ उडाली आहे. स्काय आय मानस लेकसिटीमधील आयरिस -३ हाउसिंग सोसायटीत शनिवारी (दि. ८) सकाळी साडेदहा ते अकराच्या दरम्यान हा प्रकार समोर आला. ही सोसायटी नॅशनल डिफेन्स ॲकडमीच्या (एनडीए) हद्दीपासून काही मीटर अंतरावर आहे. त्यामुळे सुरक्षेच्या दृष्टीने हा प्रकार गंभीर मानला जात आहे.
हाउसिंग सोसायटीचे अध्यक्ष सहदेव यादव यांनी याबाबत बावधन पोलिस ठाण्यात अर्ज दिला आहे. यादव हे त्यांच्या सोसायटीतील इतर दोघांसोबत शनिवारी सकाळी साडेदहा ते अकराच्या दरम्यान लिफ्टमधून बाहेर पडले. त्यावेळी त्यांना लिफ्टजवळ एक चलनी नोट दिसून आली. त्या नोटवर स्टेट बँक ऑफ पाकिस्तान असे नमूद असल्याचे दिसून आले. त्यामुळे यादव यांनी पोलिसांकडे धाव घेत अर्ज दिला. तसेच पाकिस्तानी चलनी नोट देखील पोलिसांच्या ताब्यात दिली.
बावधन पोलिसांनी संबंधित सोसायटीत पाहणी केली. सोसायटीतील सीसीटीव्ही कॅमेऱ्यांचे रेकाॅर्डिंग होत नसल्याने सीसीटीव्ही फुटेज उपलब्ध होऊ शकले नाहीत. त्यामुळे सोसायटीतील रहिवाशांकडे चौकशी करण्यात येत आहे. तसेच सोसायटीत कोण आले? डिलिव्हरी बाॅय आले का? याबाबतही पोलिस माहिती घेत आहेत.
सोसायटीतील लिफ्टजवळ आढळलेली पाकिस्तानी चलनातील नोट पोलिसांकडे दिली आहे. तसेच याबाबत अर्जही दिला आहे. - सहदेव यादव, अध्यक्ष, आयरिस ३ सोसायटी, भुकूमसोसायटीत पाहणी केली. मात्र, सोसायटीतील सीसीटीव्ही कॅमेरे सुरू असले तरी रेकाॅर्डिंग बंद आहे. त्यामुळे सीसीटीव्ही फुटेज उपलब्ध होऊ शकले नाही. याप्रकरणी गांभिर्याने चौकशी करण्यात येत आहे. -विशाल गायकवाड, पोलिस उपायुक्त, परिमंडळ दोन, पिंपरी-चिंचवड