पिंपरी : सराईत गुन्हेगारांनी हवेत गोळीबार केला. चिंचवड येथील पत्रा शेड तसेच पिंपरी येथील भाट नगर येथे मंगळवारी (दि. ६) सायंकाळी पावणेसहाच्या सुमारास ही घटना घडली. हवेत सात ते आठ गोळ्या झाडल्या असत्याचे पोलिसांकडून सांगण्यात येत आहे. या घटनेमुळे शहरात एकच खळबळ उडाली आहे.
पोलिसांनी दिलेल्या प्राथमिक माहितीनुसार, दापोडी येथील सराईत गुन्हेगार शाहरुख शेख हा त्याच्या दोन साथीदारांसह एका रिक्षातून चिंचवड येथील पत्रा शेड येथे आला. तेथे त्याने हवेत गोळीबार केला. त्यानंतर भाट नगर येथे रिक्षातून येऊन हवेत दोन गोळ्या झाडल्या. तत्पूर्वी येथील सीसीटीव्ही कॅमेरे बंद करण्यासाठी त्याने एकाला पिस्तुलाचा दाखविला. तसेच एका जणांकडे मोबाईल हिसकावला.
घटनेची माहिती मिळताच पोलिसांनी घटनास्थळी धाव घेतली. तसेच वरिष्ठ अधिकाऱ्यांसह पोलीस आयुक्त अंकुश शिंदे यांनीही घटनास्थळी पाहणी केली. सीसीटीव्ही कॅमेऱ्यांच्या फुटेज वरून आरोपींचा शोध सुरू आहे.
दिवसभर बंदोबस्त असतानाही गोळीबार
महापरिनिर्वाण दिनानिमित्त शहरात ठीक ठिकाणी पोलिसांकडून बंदोबस्त तैनात करण्यात आला आहे. असे असतानाही भर दिवसा गोळीबाराची घटना घडली. तसेच गेल्या आठवड्यात चिंचवड येथे एकावर कोयत्याने वार करून खून केला. त्यावेळी आरोपींनी दहशत निर्माण करण्यासाठी गोळीबार केला होता. गोळीबाराच्या या घटनांनी शहरातील सामान्य नागरिक दहशतीत आहेत.