पिंपरी : वाहतुकीचे नियमन करत असलेल्या पोलीस कर्मचाऱ्याला शिवीगाळ केली. ही हिंजवडी पोलिसांची हद्द आहे. हिंजवडी पोलिसाला विचार तू, इथल्या पोलिसांना मी सरळ केलेले आहे, असे म्हणत दोघांनी सरकारी कामात अडथळा निर्माण केला. पुनावळे येथे शुक्रवारी (दि. १६) दुपारी चारच्या सुमारास ही घटना घडली.
सचिन तानाजी राजपूत (वय २२, रा. कासार आंबोली, ता. मुळशी), अरुण बलराम रास्ते (वय ३०) यांच्या विरोधात पोलिसांनी गुन्हा दाखल केला. याप्रकरणी पोलीस हवालदार श्रीकांत जाधव यांनी रावेत पोलीस ठाण्यात फिर्याद दिली.
पोलिसांनी दिलेल्या माहितीनुसार, फिर्यादी पोलीस हवालदार जाधव हे वाकड वाहतूक विभागात नेमणुकीस आहेत. शुक्रवारी दुपारी चारच्या सुमारास ते पुनावळे अंडरपास येथे वाहतूक नियमन करत होते. त्यावेळी आरोपी दुचाकीवरून आले. त्यांनी मोठमोठ्याने आरडाओरड करून पोलीस हवालदार जाधव यांना शिवीगाळ केली. कुठला पोलीस आहेस. बाजूला हो. मला पुढे जाऊ दे, अशी दमदाटी केली. जाधव यांनी आरोपींना समजावून सांगण्याचा प्रयत्न केला. आरोपीने त्याची दुचाकी रस्त्यात उभी केली. तुला माहिती नाही का, ही हद्द हिंजवडी पोलीस स्टेशनची आहे. हिंजवडी पोलिसाला विचार तू, इथल्या पोलिसांना मी सरळ केलेले आहे. मी येरवडा जेलमध्ये जाऊन आलो आहे. माझ्या नादी लागू नको, असे म्हणत शिवीगाळ करून पोलीस अंमलदारांना धमकी दिली, असे फिर्यादीत नमूद आहे.