डॉक्टरकडून पेशंट तरुणीचा विनयभंग ; पिंपरीतील नामांकित रुग्णालयातील प्रकार

उपचारासाठी आलेल्या तरुणीसोबत अश्लील चाळे करुन डॉक्टरनेच तिचा विनयभंग केल्याचा धक्कादायक प्रकार पिंपरीतील एका नामांकित खासगी रुग्णालयात घडला आहे.

पिंपरी : उपचारासाठी आलेल्या तरुणीसोबत अश्लील चाळे करुन डॉक्टरनेच तिचा विनयभंग केला. हा धक्कादायक प्रकार पिंपरी येथील एका नामांकित खासगी रुग्णालयाच्या लेबर वार्ड रुममध्ये रविवारी (दि.२३) रोजी दुपारी अडीचच्या सुमारास घडली.  याप्रकरणी २० वर्षीय तरुणीने पिंपरी पोलीस ठाण्यात फिर्याद दिली आहे. त्यानुसार, रुग्णालयातील डॉ. हर्षल बसवराज निबान्नवर (वय २८, रा.तुलीप हाईट्स वाघेरे टॉवर, नेहरुनगर) याच्या विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, पीडित २० वर्षीय तरुणी रविवारी दुपारी अडीचच्या सुमारास उपचार घेण्यासाठी संत तुकारामनगर येथील एका खासगी रुग्णालयात गेल्या होत्या. यावेळी तेथे उपस्थित डॉ. हर्षल याने उपचार करतेवेळी तरुणीच्या अंगाला वारंवार हात लावला. तुम्हाला बरे वाटू अगर न वाटू, तुम्हाला चार दिवस अ‍ॅडमिट व्हावेच लागेल, असे म्हणाला. तसेच त्यांची तपासणी करताना तिला लज्जा वाटेल अशा ठिकाणी हात लावून विनयभंग केला. या प्रकरणी पिंपरी पोलीस ठाण्यात गुन्हा दाखल करण्यात आला असून आरोपी डॉक्टरला अद्याप अटक करण्यात आलेली नाही. या प्रकरणाचा अधिक तपास पोलीस उपनिरीक्षक हरिदास बोचरे करत आहेत.