पिंपरी : मागासवर्गीय महिलेच्या आजीची जमीन साठेखत आणि कुलमुखत्यारपत्र करून स्वत:च्या नावावर केल्याप्रकरणी १२ जणांविरोधात फसवणूक आणि ॲट्रॉसिटीचा गुन्हा दाखल करण्यात आला आहे. ही घटना ४ डिसेंबर २००३ ते २ मार्च २०१० या कालावधीत खेड तालुक्यातील पाईट येथे घडली.
साठवर्षीय महिलेने महाळुंगे एमआयडीसी पोलिस ठाण्यात फिर्याद दिली आहे. पोपट मारुती घनवट (वय ७४), शंकर मारुती रौंधळ (मृत), काळूराम महादू जाधव (वय ७५), विजय सुदाम घनवट (वय ४४), संतोष शंकर रौंधळ (मृत), भगवान शंकर गायकवाड, चिंतामण कृष्णा रौंधळ, अरुण गुंडाळ आणि चार महिलांविरोधात गुन्हा दाखल करण्यात आला आहे. फिर्यादी महिलेच्या आजीची खेड तालुक्यातील पाईट येथे ८६ गुंठे जमीन होती. आजीने ही जमीन शंकर रौंधळ यांना परत देण्याच्या बोलीवर १९६७ मध्ये विकली होती. त्या व्यवहारानुसार १९८९ मध्ये शंकर रौंधळ यांनी ती जमीन फिर्यादीच्या वडिलांना परत दिली होती. त्याचा लेखी करार आणि मोबदला रौंधळ यांनी घेतला होता.
दरम्यान, रौंधळ यांचा ११ सप्टेंबर १९९७ रोजी मृत्यू झाला. या व्यवहाराची माहिती असताना पोपट घनवट याने रौंधळ यांच्याच नावाचा तोतया उभा करून त्याच्याकडून स्वत:च्या नावावर साठेखत आणि काळूराम जाधव याच्या नावावर कुलमुखत्यारपत्र लिहून घेतले. त्याआधारे विजय घनवट याच्या नावे जमीन खरेदी केली. सहायक पोलिस आयुक्त राजेंद्रसिंग गौर तपास करीत आहेत.