हिंजवडीत कॉम्प्युटर इंजिनिअरला मारहाण करुन लुबाडले 

संगणक अभियंत्यास मारहाण करून खिशातील मोबाइल तसेच पायातील स्पोर्ट शूज काढून घेतले. त्यानंतर त्यांच्या जवळील एटीएम कार्डही काढून घेतले.

हिंजवडी : बालेवाडी येथे रात्री घरी जात असलेल्या एका संगणक अभियंत्यास मारहाण करून लुबाडण्यात आले. एटीएम कार्ड घेऊन त्याच्या खात्यातील ९ हजार रुपये काढून घेतले. ही घटना बालेवाडी येथे घडली. पलाष विवेक चिंचोळीकर (वय २५, रा. हिंजवडी) असे मारहाणीत जखमी झालेल्या संगणक अभियंत्यांचे नाव आहे. याबाबत हिंजवडी पोलीस ठाण्यात मंगळवारी (दि. १९ जून ) फिर्याद दिली आहे .पोलिसांनी तीन अज्ञात चोरट्यांच्या विरोधात गुन्हा दाखल केला आहे.पोलिसांनी दिलेल्या माहितीनुसार, शनिवारी मध्यरात्री एकच्या सुमारास चिंचोळीकर हे घरी जात होते. ते बालेवाडी स्टेडियमच्या मुख्य प्रवेशद्वाराजवळ आले असता दुचाकीवरील तीन चोरटे आले. त्यांनी चिंचोळीकर यांना मारहाण केली. खिशातील मोबाइल तसेच पायातील स्पोर्ट शूज काढून घेतले. त्यानंतर त्यांच्या जवळील एटीएम कार्डही काढून घेतले. मारण्याची भीती दाखवत एटीएम कार्डचा पासवर्ड विचारला. त्याद्वारे नऊ हजार २०० रुपये एटीएम मधून काढून घेतले. हिंजवडी पोलीस याबाबत अधिक तपास करत आहेत.