हिंडवडीत गाडी हळू चालविण्यास सांगितल्याने बेदम मारहाण

रात्री दहाच्या सुमारास ही घटना घडली...

पिंपरी : गाडी हळू चालव, असे सांगितल्याच्या रागातून एकाला बेदम मारहाण करून जखमी केले. याप्रकरणी अल्पवयीन मुलासह सहा जणांच्या विरोधात पोलिसांनी गुन्हा दाखल केला. हिंजवडी येथे गुरुवारी (दि. १९) रात्री दहाच्या सुमारास ही घटना घडली. 

अमोल रामदास शिंदे (वय ३६, रा. हिंजवडी), असे जखमी झालेल्याचे नाव आहे. त्यांनी याप्रकरणी शुक्रवारी (दि. २०) हिंजवडी पोलीस ठाण्यात फिर्याद दिली. बालाजी संपत, शाम चव्हाण आणि अल्पवयीन मुलगा तसेच त्यांचे तीन साथीदार यांच्या विरोधात पोलिसांनी गुन्हा दाखल केला.

पोलिसांनी दिलेल्या माहितीनुसार, फिर्यादी हे त्यांच्या घराजवळ त्यांची चारचाकी गाडी धुत होते. त्यावेळी बालाजी संपत हा त्याची दुचाकी भरधाव घेऊन येऊन फिर्यादीच्या गाडी समोरून जाऊन भिंतीला धडकला. गाडी हळू चालव, असे फिर्यादी त्याला म्हणाले. त्याचा राग आल्याने चिडून जाऊन बालाजी संपत याने फिर्यादीला शिवीगाळ केली. त्यानंतर तो त्याच्या चार मित्रांना घेऊन आला. तसेच अल्पवयीन मुलगा देखील तेथे आला. त्यानंतर आरोपींनी फिर्यादीला हाताने, काठीने तसेच दगडाने मारहाण केली. यात फिर्यादी जखमी झाले, असे फिर्यादीत नमूद आहे.