Ram Mandir Bhoomi Pujan: पंतप्रधान नरेंद्र मोदींचे श्रीरामाला साष्टांग नमन, पाहा भूमिपूजन सोहळ्याची ऐतिहासिक क्षणचित्रे

अयोध्येतील रामजन्मभूमीवर आज पंतप्रधान नरेंद्र मोदींच्याहस्ते मंदिराच्या कामाचे भूमिपूजन आणि कोनशिलांचे पूजन झाले.

अनेक वर्षांपासून प्रतीक्षा असलेल्या अयोध्येतील राम मंदिराच्या बांधकामाला अखेर आजपासून सुरुवात झाली आहे. अयोध्येतील रामजन्मभूमीवर आज पंतप्रधान नरेंद्र मोदींच्याहस्ते मंदिराच्या कामाचे भूमिपूजन आणि कोनशिलांचे पूजन झाले.

दरम्यान, राममंदिराच्या भूमिपूजनाच्या ठिकाणी पोहोचण्यापूर्वी पंतप्रधान नरेंद्र मोदींनी हनुमान गढी येथे जाऊन पारंपरिक पद्धचीने पूजा केली. अयोध्येमध्ये श्रीरामाचे दर्शन घेण्यापूर्वी हनुमानगढी येथील मंदिरात जाऊन दर्शन घेण्याची प्रथा आहे.

हनुमानगढी मंदिरात दर्शनासाठी आलेल्या पंतप्रधान नरेंद्र मोदींचे मंदिरातील प्रमुख पूजारी श्री गद्दीनशीन प्रेमदास महाराज यांनी पगडी आणि चांदीचा मुकुट देऊन स्वागत केले.

अयोध्येच्या बरोबर मध्यावर हनुमागनढी येथे रामभक्त हनुमानाचे मंदिर आहे. अयोध्येत आल्यावर प्रथम बजरंगबलीचे दर्शन घ्यावे त्यानंतर इतर मंदिरात दर्शनासाठी जावे,अशी रीत आहे.

हनुमानगढी येथे दर्शन घेतल्यानंतर पंतप्रधान नरेंद्र मोदी अयोध्येतील राम जन्मभूमी येथे भूमीपूजनासाठी पोहोचले. तिथे पोहोचल्यावर मोदींनी रामलल्लांना साष्टांग नमन केले.

पंतप्रधान मोदींनी येथे आजच्या दिवसाची आठवण म्हणून पारिजातकाचे रोपटे लावले. यावेळी उत्तर प्रदेशचे मुख्यमंत्री योगी आदित्यनाथ तसेच सरसंघचालक मोहन भागवत उपस्थित होते.

रामलल्लाचे दर्शन घेतल्यानंतर मोदींनी सर्व धार्मिक विधी पूर्ण केले. तसेच राम मंदिराच्या कोनशिलेचे पूजन करून मंदिराच्या बांधकामाची मुहुर्तमेढ रोवली.

राम मंदिराच्या भूमिपूजनासाठी आज दुपारी बारा वाजून ४४ मिनिटे आणि ८ सेकंदांचा शुभ मुहुर्त काढण्यात आला होता.

राम मंदिराच्या भूमिपूजन सोहळ्यादरम्यान एकूण ९ शिळांचे पूजन करण्यात आले. याशिवाय भगवान श्रीरामांची कुलदेवी कालीमातेची पूजासुद्धा करण्यात आली.

दरम्यान, आजच्या भूमिपूजन सोहळ्यानंतर राममंदिराच्या उभारणीच्या कामाला वेग येण्याची शक्यता आहे.

श्रीरामजन्मभूमी तीर्थक्षेत्र ट्रस्टने राम मंदिराच्या उभारणीसाठी वेळमर्यादा निश्चित केलेली आहे. त्यानुसार २०२४च्या पूर्वी अयोध्येत राम मंदिर बांधून पूर्ण होईल, अशी अपेक्षा आहे.

दरम्यान, राम मंदिराच्या बांधणीसाठी देशभरात जिथे जिथे शिलांचे पूजन झाले. त्यातील सर्व शिळांचा वापर राम मंदिराच्या उभारणीसाठी करण्यात येणार आहे.