३१ मार्च शेवटची संधी! 'ही' आठ कामे करुन घ्या, नाहीतर अडचणी वाढणार

३१ मार्चपर्यंत महत्वाची कामे करुन घ्या, ही कामे नाही केली तर तुमचं मोठं नुकसान होऊ शकतं.

जर तुम्हाला तुमचे आधार अपडेट करायचे असेल तर तुम्ही १४ मार्चपर्यंत मोफत अपडेट करू शकता. यानंतर तुमच्याकडून पैसे वसूल केले जातील. सरकारने १० वर्षे जुने आधार कार्ड अपडेट करण्यास सांगितले होते.

आरबीआयने पेटीएम पेमेंट्स बँकेच्या सेवा १५ मार्चपर्यंत सुरू ठेवण्याचे निर्देश दिले होते. यानंतर पेटीएम पेमेंट्स बँकेच्या सर्व सुविधा बंद होतील. याशिवाय ग्राहकांच्या खात्यात पैसे जमा करण्यावरही बंदी घालण्यात येणार आहे. याशिवाय क्रेडिटचे व्यवहारही करता येणार नाहीत. तुम्ही तुमची जमा केलेली रक्कम काढू शकता आणि ती इतर ठिकाणी ठेवू शकता.

SBI अमृत कलश मध्ये गुंतवणूक करण्याचा शेवटचा दिवस ३१ मार्च २०२४ आहे. SBI च्या वेबसाइटनुसार, तुम्ही ७.१०% व्याजदराने ४०० दिवसांची विशेष FD घेऊ शकता. या FD अंतर्गत ज्येष्ठ नागरिकांना ७.६०% व्याजदर दिले जाईल.

SBI WeCare वर दिलेले व्याज दर ७.५०% आहे. ज्येष्ठ नागरिकांसाठी SBI WeCare मध्ये गुंतवणूक करण्याची अंतिम तारीख ३१ मार्च २०२४ आहे. याशिवाय, SBI गृह कर्जावरील विशेष मोहिमेची सूट ३१ मार्च २०२४ पर्यंत वैध आहे. ही सवलत CIBIL स्कोअर नुसार Flexipay, NRI, पगार नसलेल्या गृहकर्जांवर दिली जाईल.

IDBI बँकेची विशेष FD ३०० दिवस, ३७५ दिवस आणि ४४४ दिवसांच्या कालावधीसाठी अनुक्रमे ७.०५%, ७.१०% आणि ७.२५% व्याजदर देते. या FD मध्ये पैसे गुंतवण्याची अंतिम मुदत ३१ मार्च २०२४ आहे.

जर तुम्हाला टॅक्ससाठी पैसे वाचवायचे असतील, तर आर्थिक वर्ष २०२३-२४ साठी कर वाचवण्याची अंतिम मुदत ३१ मार्च आहे. याआधी तुम्हाला कोणत्याही कर बचत योजनेत गुंतवणूक करावी लागेल.

आर्थिक वर्ष २०२३-२४ साठी अॅडव्हान्स टॅक्सचा चौथा हप्ता भरण्याची अंतिम तारीख १५ मार्च आहे. या तारखेपर्यंत अॅडव्हान्स कराचा अंतिम हप्ता भरण्याची शेवटची तारीख आहे.

जर तुम्ही फास्टॅग वापरकर्ते असाल तर तुम्हाला ३१ मार्चपर्यंत तुमचे फास्टॅग केवायसी अपडेट करावे लागेल.