कुलूप लावलेले दोन कोविड सेंटर पुन्हा उघडले

परभणी: कोरोनाच्या रुग्णांची संख्या वाढत असल्याने जिल्हा प्रशासनाने शहरातील दोन कोविड सेंटर पुन्हा सुरू करण्याचा निर्णय घेतला असून, मंगळवारी या इमारती अधिग्रहीत करण्याची प्रक्रिया सुरू करण्यात आली आहे.

डिसेंबर महिन्यात कोरोनाचा संसर्ग कमी झाल्याने सर्व कोविड केअर सेंटर बंद करण्याचा निर्णय घेण्यात आला होता. मागच्या दोन महिन्यात या केंद्रांना चक्क कुलूप लागले होते. परभणी शहरात तीन कोविड केअर सेंटर सुरू होते. त्यापैकी कस्तुरबा गांधी बालिका विद्यालय आणि अक्षदा मंगल कार्यालयाचे कोविड सेंटर सुरू करण्याचा निर्णय जिल्हाधिकारी दीपक मुगळीकर यांनी घेतला असून, त्यानुसार २३ फेब्रुवारी रोजी या दोन्ही इमारती अधिग्रहीत करण्याची कारवाई सुरू होती. त्यामुळे मंगळवारी तरी या सेंटरमध्ये एकही रुग्ण उपचार घेत नव्हता. या इमारती ताब्यात घेतल्यानंतर आरोग्य विभाग त्या ठिकाणी आवश्यक त्या उपाययोजना करणार आहे.

शहरातील कोविड केअर सेंटर रुग्ण

कस्तुरबा गांधी बालिका विद्यालय : ००

अक्षदा मंगल कार्यालय : ००

तालुक्याच्या ठिकाणी एकही केंद्र नाही

तालुक्याच्या ठिकाणी अद्याप एकही केंद्र सुरू झाले नाही. जिंतूर, बोरी, पाथरी, मानवत, पूर्णा, पालम, सोनपठ, गंगाखेड, सेलू या ठिकाणी हे केंद्र यापूर्वी कार्यरत होते. रुग्ण संख्या वाढीचा वेग लक्षात घेऊन हे केंद्र सुरू केले जाणार असल्याचे प्रशासनाने सांगितले.

गंगाखेड तालुक्यात पुन्हा तीन रुग्ण

गंगाखेड तालुक्यातील कोरोनाचा संसर्ग कमी झाल्याने मागच्या दोन-तीन महिन्यात या तालुक्यात एकही रुग्ण नोंद झाला नव्हता. मात्र मागील आठवड्यात दोन विद्यार्थ्यांसह एका ५० वर्षीय व्यक्तीला कोरोनाची लागण झाल्याने तालुकावासियांची चिंता वाढली आहे. कोविडच्या पहिल्या टप्प्यात गंगाखेड तालुक्यात सर्वाधिक रुग्ण होते. आता पुन्हा तीन रुग्णांची भर पडली आहे.

जिल्ह्यात कोरोनाचा संसर्ग वाढत असल्याने कोविड केअर सेंटर सुरू केले जाणार आहेत. परभणीतील दोन इमारती त्यादृष्टीने ताब्यात घेण्याची प्रक्रिया सुरू केली असून, टप्प्या-टप्प्याने तालुक्याच्या ठिकाणचे केंद्रही सुरू केले जाणार आहेत. प्रशासनाने कोरोनाचा प्रतिबंध करण्यासाठी आवश्यक त्या सर्व उपाययोजना सुरू केल्या आहेत.

दीपक मुगळीकर, जिल्हाधिकारी