बावीसशे रुपयांनाच मिळणार रेमडेसिविर इंजेक्शन

परभणी : कोरोना रुग्णांवर उपचार करण्यासाठी आवश्यक असलेले रेमडेसिविर हे इंजेक्शन २ हजार २०० रुपयांनाच उपलब्ध करून दिले जाणार असल्याचा निर्णय केमिस्ट अँड ड्रगिस्ट असोसिएशन समवेत झालेल्या जिल्हा प्रशासनाच्या बैठकीत घेण्यात आला आहे.

जिल्ह्यात कोरोनाबाधित रुग्णांची संख्या मोठ्या प्रमाणात वाढली असून, अत्यवस्थ असणाऱ्या रुग्णांना रेमेडेसिविर इंजेक्शन द्यावे लागते. डॉक्टरांच्या सल्ल्यानुसार या इंजेक्शनची मागणी झाल्यानंतर रुग्णांच्या नातेवाईकांना हे इंजेक्शन बाजारात उपलब्ध होत नव्हते. या इंजेक्शनचा तुटवडा निर्माण झाल्याने अनेक ठिकाणी चढ्या भावाने इंजेक्शनची विक्री होत होती. जिल्ह्यातील कोरोना संसर्गाची परिस्थिती आणि रेमडेसिविर इंजेक्शनचा उपलब्ध साठा लक्षात घेऊन जिल्हाधिकारी दीपक मुगळीकर यांनी १० एप्रिल रोजी सायंकाळी ६ वाजता जिल्ह्यातील औषध विक्रेते संघटनेचे पदाधिकारी आणि अन्न व औषध प्रशासनाच्या अधिकाऱ्यांसमवेत बैठक घेतली. या बैठकीत रेमडेसिविर इंजेक्शनबाबत आढावा घेण्यात आला. कोरोनाच्या महामारीत रेमडेसिविर इंजेक्शन जिल्‍ह्यातील रुग्‍णांना २ हजार २०० रुपयांमध्ये उपलब्ध करून देण्याचा निर्णय या बैठकीत घेतला आहे. त्यामुळे जिल्ह्यात यापुढे रेमडेसिविर इंजेक्शन २ हजार २०० रुपयांना मिळेल, याची सर्व रुग्णांच्या नातेवाईकांनी खात्री करून घ्यावी, असे आवाहन परभणी जिल्हा केमिस्ट अँड ड्रगिस्ट असोसिएशनचे अध्यक्ष संजय मंत्री आणि सचिव सूर्यकांत हाके यांनी केले आहे.

जिल्हाधिकाऱ्यांसमवेत पार पडलेल्या या बैठकीला अन्न व औषध प्रशासनाचे सहाय्यक आयुक्त मरेवाड, औषध विक्रेता संघटनेचे जिल्हाध्यक्ष संजय मंत्री, सचिव सूर्यकांत हाके, पवन झांजरी, अनिल हराळ, सुनील जोशी आदी उपस्थित होते.