रेमडेसिविरच्या तक्रारीसाठी आता वॉररूमची स्थापना

कोरोनाबाधितांची संख्या वाढत असल्याने रुग्णांवर उपचारासाठी आवश्यक असलेल्या रेमडेसिविर इंजेक्शनचा काळा बाजार जिल्ह्यात वाढला आहे. या पार्श्वभूमीवर रेमडेसिविर इंजेक्शन पुरवठा व वितरण याबाबत जनतेला माहिती मिळावी, यासाठी तसेच या अनुषंगाने येणाऱ्या तक्रारींचे निवारण करण्यासाठी जिल्हाधिकारी कार्यालयात २४ तासांसाठी वॉररूम स्थापन करण्यात आली आहे. यासाठी ०२४५२-२२६४००/१०७७ क्रमांक देण्यात आला आहे. यासाठी संपर्क अधिकारी म्हणून जिल्हा आपत्ती व्यवस्थापन अधिकारी व निवासी उपजिल्हाधिकारी यांची नियुक्ती करण्यात आली आहे. त्यांच्याकडे त्यांच्या भ्रमणध्वनीवरदेखील तक्रार करता येणार आहे. तसेच कोविड प्रादुर्भाव संदर्भातील माहितीसाठी परभणी मनपास्तरावर देखील वॉररूम स्थापन करण्यात आली आहे. येथे नागरिकांना ९०४९३५१९९९ व ९०४९३६१९९९ या मोबाइल क्रमांकावर आणि जिल्हा परिषद इमारत येथील वॉररूम येथे ०२४५२-२२३९०० या क्रमांकावर नागरिकांना संपर्क साधता येणार असल्याची माहिती जिल्हाधिकारी कार्यालयाच्या वतीने देण्यात आली.