कोरोनाबाधितांच्या जेवणाचे ‘नो टेन्शन’

जिल्ह्यात कोरोनाचा संसर्ग वाढल्याने शासकीय रुग्णालयात दाखल होणाऱ्या कोरोनाबाधित रुग्णांना शासनाच्यावतीने दररोजच्या भोजनाची व्यवस्था केली जात आहे. शहरात दोन कोविड रुग्णालयांसह अक्षता आणि रेणुका मंगल कार्यालयाच्या कोरोना केअर केंद्रांमध्ये दाखल सुमारे ७०० ते ८०० रुग्णांना दररोज कंत्राटदारामार्फत भोजनाची सुविधा करण्यात आली आहे. विशेष म्हणजे, कंत्राटदारांना नियमित त्यांची बिलेही मिळत आहेत. काही ठिकाणी कंत्राटदारांची बिले रखडल्याने रुग्णांच्या भोजनाचा प्रश्न निर्माण झाला होता; परंतु परभणीत मात्र नियमित बिले दिली जात असल्याची माहिती कंत्राटदाराने दिली. त्यामुळे रुग्णांच्या भोजनाचा प्रश्न मिटला आहे.

असा दिला जातो आहार

दररोज सकाळी ७ वा. चार बदाम, काढा. सकाळी ९ वा. नाश्त्यामध्ये एक अंडे, उपमा, पोहे, मटकी, इडली. सकाळी ११ वाजता चहा. दुपारी १ वाजता जेवण. (वरण, भात, भाजी, पोळी). सायंकाळी ४ वाजता : चहा आणि बिस्किट. सायंकाळी ५ वाजता : काढा, सायंकाळी ७ ते ७.३० : जेवण. रात्री ९ वाजता : हळद दूध. दर रविवारी पनीरची भाजी आणि गोड पदार्थ.

परभणी शहरातील कोरोना रुग्णांना दररोज रुचकर जेवण देण्यासाठी प्रयत्न करीत आहे. प्रशासनाकडूनही या जेवणाची बिले वेळेच्यावेळी मिळतात. त्यामुळे कोणतीही अडचण नाही.

संपत पुरी, कंत्राटदार

अक्षता मंगल कार्यालयातील कोरोना केअर सेंटरमध्ये कोरोनावर उपचार घेत आहे. या काळात प्रशासनाकडून दिले जाणारे जेवण रुचकर असते. जेवणाबद्दल कोणतीही तक्रार नाही.

कोरोनाबाधित रुग्ण

रेणुका मंगल कार्यालयातील कोविड केअर सेंटरमध्ये उपचार घेत आहे. दररोज नियमित वेळेच्यावेळी जेवण आणि सकस आहार मिळत आहे. जेवणाबाबत आमची कोणतीही तक्रार नाही. रुचकर जेवण मिळत असल्याने आरोग्य सुदृढ राहण्यास मदत होते.

कोरोनाबाधित रुग्ण