गांधी पार्कातील कचरा हटेना

कच्छी बाजार रस्त्यावर खोदकाम

परभणी : शहरातील कच्छी बाजार भागात रस्त्याच्या मधोमध खोदकाम करण्यात आले आहे. त्यामुळे वाहतुकीस अडथळे निर्माण होत आहेत. आधीच या रस्त्यावर मोठ्या प्रमाणात खड्डे आहेत. त्यातच जड वाहनांची वर्दळ अधिक असते. त्याचा त्रास वाहनधारकांना सहन करावा लागत आहे. मनपा प्रशासनाने खोदलेला रस्ता व्यवस्थित बुजवावा, अशी वाहनधारकांची मागणी आहे.

नागरिकांकडे थकला मालमत्ता कर

परभणी : शहरातील नागरिकांकडे लाखो रुपयांचा मालमत्ता कर थकला आहे. मागील वर्षी कोरोनाचे संकट असल्याने कर वसुलीला अत्यल्प प्रतिसाद मिळाला. त्यामुळे मनपाने यावर्षी कर वसुलीवर भर दिला आहे. कराची वसुली न झाल्यास दंडात्मक कारवाई करण्याचा इशारा मनपा प्रशासनाने दिला आहे. कर वसुली होत नसल्याने इतर सुविधा पुरविताना मनपाला आर्थिक समस्यांचा सामना करावा लागत आहे.

सोसायट्यांच्या निवडणुकीची ग्रामीण भागात तयारी

परभणी : आगामी काळात जिल्ह्यात सोसायट्यांच्या निवडणुका होत आहेत. या सोसायट्या आपल्याच ताब्यात राहाव्यात, यासाठी गावपुढारी प्रयत्न करीत आहेत. ग्रामपंचायत निवडणुकीतील सरपंच आणि उपसरपंचांची निवड झाल्यानंतर आता सोसायटी निवडणुकीचे वेध लागणार आहेत. त्याची तयारी आतापासूनच ग्रामीण भागात सुरू झाली आहे. त्यामुळे या निवडणुकीच्या निमित्ताने पुन्हा एकदा ग्रामीण वातावरण तापणार आहे.