स्वॅबच्या अहवालासाठी विलंब

परभणी : जिल्ह्यात स्वॅब नमुने तपासणी करण्यासाठी स्वतंत्र प्रयोगशाळा उभारण्यात आल्यानंतरही ते अहवाल प्राप्त होण्यास तीन दिवसांचा कालावधी लागत असल्याने स्वॅब नमुने दिलेल्या नागरिकांना मात्र अहवालासाठी प्रतीक्षा करावी लागत आहे. त्यामुळे या प्रयोगशाळेतील स्वॅब नमुने तपासण्याची गती वाढविण्याची गरज निर्माण झाली आहे.

मागील वर्षी कोरोनाचा संसर्ग वाढल्यानंतर जिल्ह्यातील नागरिकांची आरटीपीसीआर तपासणी सुरू करण्यात आली. मात्र परभणी येथे प्रयोगशाळा नसल्याने स्वॅब नमुने सुरुवातीला पुणे येथील राष्ट्रीय विषाणू प्रयोगशाळेत, त्यानंतर औरंगाबाद व नांदेड येथील प्रयोगशाळेत पाठवून तपासणी केली जात होती. त्यासाठी मोठा वेळ खर्ची घालावा लागत असे. त्यामुळे मागील वर्षीच जिल्ह्यात स्वॅब नमुने तपासण्याची प्रयोगशाळा कार्यान्वित करण्यात आली. सुरूवातीला २०० स्वॅब नमुने तपासण्याची या प्रयोगशाळेची क्षमता होती. ती आता २२०० पर्यंत झाली आहे. आरोग्य विभागाने अद्ययावत मशीन खरेदी करुन स्थानिक पातळीवरच स्वॅब नमुने तपासण्यास प्रारंभ केला आहे. त्यामुळे जिल्हावासियांची गैरसोय दूर झाली. स्वॅब नमुन्यांचे अहवाल तातडीने प्राप्त होतील, अशी आशा होती. मात्र ती फोल ठरली असून, नागरिकांना तीन ते साडेतीन दिवसांपर्यंत अहवालासाठी प्रतीक्षा करावी लागत आहे.

मागील आठवड्यापासून जिल्ह्यातही कोरोनाच्या रुग्णांची संख्या वाढत आहे. राज्यात कोरोनाची दुसरी लाट येण्याची भिती व्यक्त केली जात आहे. त्यामुळे अशा परिस्थितीत केवळ स्वॅब चाचण्या वाढवून चालणार नाही तर त्याचे अहवालही नागरिकांपर्यंत तातडीने पोहोचती करण्याची गरज आहे. मात्र जिल्ह्यात अजूनही अहवाल देण्यासाठी गती मिळालेली नाही. परिणामी रुग्णांचे निदान लागण्यासही विलंब होत असून, यातून कोरोनाचा संसर्ग वाढण्याची भिती निर्माण झाली आहे.

अशी केली जाते चाचणी...

जिल्ह्यात ठिकठिकाणी सध्या नागरिकांचे स्वॅब नमुने घेतले जातात. स्वॅब घेतल्यानंतर त्याची एस.आर.ए. फाईल तयार केली जाते. या नमुन्यांना रुग्णाच्या नावासह स्टीचिंग केल्यानंतर ते प्रयोगशाळेत पाठविले जातात. या प्रक्रियेसाठी साधारणत: एक दिवसाचा वेळ लागतो. प्रयोगशाळेत स्वॅब नमुना प्राप्त झाल्यानंतर स्वॅबमधील आरएनए घटक वेगळा करुन स्वॅब मशीनच्या स्लॉटमध्ये ठेवून त्यावरुन चाचणी केली जाते. या प्रक्रियेला साधारणत: दीड तासाचा वेळ लागतो. या प्रयोगशाळेकडे सध्या ७०० ते ८०० स्वॅब दररोज प्राप्त होत आहेत. प्रयोगशाळला स्वॅब प्राप्त झाल्यानंतर एका दिवसांत अहवाल देणे अपेक्षित आहे.

स्लॉटची संख्या वाढविण्याची आवश्यकता

येथील प्रयोगशाळेत उपलब्ध असलेल्या मशीनमध्ये विविध प्रकारचे स्लॉट आहेत. काही मशीनमध्ये पाच तर काही मशीनमध्ये १० स्लॉट आहेत.याचाच अर्थ एकाच वेळी ५ ते १० स्वॅब नमुन्यांची तपासणी करणे शक्य आहे. या स्लॉटची संख्या वाढविण्यासाठीही प्रयत्न करण्याची आवश्यकता आहे.