ग्रुपीचं वेड
By Admin | Updated: January 29, 2015 16:23 IST2015-01-29T16:21:58+5:302015-01-29T16:23:33+5:30
काय काय जाहीर सांगतात, मुलं आपल्या ग्रुपीतून? आपण जे करू त्या प्रत्येक गोष्टीचे फोटो काढून ते शेअर करण्याचं वेड स्मार्टफोन वापरणार्‍या तरुण मुला-मुलींमध्ये प्रचंड दिसतं. ते किती टोकाचं आहे, हे समजून घेतलं तरी धास्ती वाटावी इतकं आपलं जगणं लोकांना सांगण्याची उर्मी भयंकर आहे.
ग्रुपीचं वेड
आपण जे करू त्या प्रत्येक गोष्टीचे फोटो काढून ते शेअर करण्याचं वेड स्मार्टफोन वापरणार्‍या तरुण मुला-मुलींमध्ये प्रचंड दिसतं. ते किती टोकाचं आहे, हे समजून घेतलं तरी धास्ती वाटावी इतकं आपलं जगणं लोकांना सांगण्याची उर्मी भयंकर आहे.
१) आपले कॉलेजचे, पिकनिकचे, बर्थ डे सेलिब्रेशन, बायकिंग, ट्रेकिंग या ग्रुप फोटोंचं आभासी जगात सर्वाधिक शेअरिंग होतं. अनेक माणसं, त्यावर अनेक माणसांच्या अनेक कॉमेण्ट्स, त्यावरच्या चर्चा यासगळ्यात मजा येते म्हणून तरुण मुलं ग्रुप फोटो काढकाढून शेअर करतात.
२) काही मुलं स्वत:चे फोटो अगदी आपला आवडता कपडा, आरसा, कॉफी मग याबरोबर काढूनही सतत शेअर करतात. त्या फोटोत एकच जीवंत माणूस असला, तरी त्यांच्या मते त्या फोटोत ते एकटे नसतात.
३) आता तर फॅड आहे ते बाथरूम सेल्फीज्चं. खरं तर बाथरूम ही अत्यंत व्यक्तिगत वापराची जागा. मात्र, तरीही बाथरूमध्ये जाऊन आपला रिलॅक्स मूड जगाला सांगण्याची होड अनेकांमध्ये दिसते.
४) तिसरा प्रकार सतत पाटर्य़ा करणार्‍यांचा. हे म्हणजे आपण किती हॅपनिंग लाइफ जगतो, कुठं-कुठं फिरायला जातो, हे सतत लोकांना सांगत रहायचं. त्यातून आपण किती सुखी आहोत हे जगाला दाखवत रहायचं.
५) आपल्या इण्टिमेट आयुष्यातले फोटोही अनेक कपल्स शेअर करतात. शरीरसंबंधांपूर्वीचे चेहरे आणि नंतरचे चेहरे असं शेअर करण्याचा ट्रेण्ड पाश्‍चिमात्य तरुणांमध्ये प्रचंड मोठा आहे.
६) आणि सगळ्यात ज्या सेल्फीज आणि ग्रुपींची सध्या पाश्‍चिमात्य जगात भयंकर स्फोटक चर्चा सुरू आहे, ते म्हणजे थायगॅप सेल्फी आणि ग्रुपी. अनेक गोलमटोल मुली इतर मुलींचे फोटो पाहून आपण बारीक व्हायचा चंग बांधतात. आणि कंबरेचे दोन हाडं दिसण्याइतपत बारीक झाल्या की, त्याचे फोटो काढून शेअर करतात. अनेक मुली तर ग्रुप बनवून असे फोटो शेअर करतात.
या भयंकर वेडाची आणि नस्त्या धाडसाची तिकडेही प्रचंड चर्चा आहे.
ही चटक, धोकादायक.
१) इतर व्यसनांची जशी चटक लागते तशीच ही फोटो काढण्याची आणि शेअर करण्याचीही चटक लागते.
२) अनेक मुलं पाटर्य़ांना जातात, एकत्र येऊन काही तरी उद्योग करतात ते असले ग्रुपी काढता यावेत म्हणून. आपण जे करतोय त्यात काही मजा येत नाही; मात्र त्याचा फोटो काढून तो शेअर करण्यात आणि त्यावर चर्चा करण्यातच अनेकांना मजा वाटते.
३) आपल्या अत्यंत खासगी गोष्टी आपण जगाला सांगतो, आपण काय करतो याची जाहीर डायरीच लिहितो याचं भान राहत नाही, आणि मग अनेकदा नको ती माहिती जगाला पुरवल्यानं घोळ होऊन आयुष्यच चावडीवर येतं.
४) अनेकांच्या फोटोंचा गैरवापर होऊ शकतो, होतो. आणि मग त्यातून मनस्तापही होतोच होतो.
५) अनेकजण आपलं प्रत्यक्ष जगणं विसरून फक्त ऑनलाइन जगातच हरवून जातात.
६) आज जगभरात या विषयावर अभ्यास तर सुरू आहेच, पण अनेक तरुण मुलं ब्लॉग लिहून आपला अनुभव सांगत आहे.
