‘प्ले आॅफ’पूर्वी पंजाबविरुद्ध सनरायझर्स हैदराबादची लढत

सनरायझर्स हैदराबादला मागच्या सामन्यात दिल्लीने पराभवाची चव चाखविल्यानंतर ‘प्ले आॅफ’मध्ये स्थान निश्चितीसाठी आज रविवारी किंग्ज इलेव्हन पंजाबला नमविण्याचे आव्हान हैदराबादपुढे असेल.

मोहाली : आघाडीचे स्थान पटकविणाऱ्या सनरायझर्स हैदराबादला मागच्या सामन्यात दिल्लीने पराभवाची चव चाखविल्यानंतर ‘प्ले आॅफ’मध्ये स्थान निश्चितीसाठी आज रविवारी किंग्ज इलेव्हन पंजाबला नमविण्याचे आव्हान हैदराबादपुढे असेल.आतापर्यंत खराब कामगिरी करणाऱ्या पंजाबने मुंबईला पराभूत करीत फॉर्ममध्ये आल्याचे संकेत दिल्याने हैदराबादसाठी धोक्याची घंटा आहे. ११ पैकी चार सामन्यांत पराभूत झालेल्या पंजाबने मुंबईला सात गड्यांनी चकविले होते. पंजाब घरच्या मैदानावर खेळणार असल्याने डेव्हिड वॉर्नरच्या नेतृत्वाखालील हैदराबादला सावध पवित्रा घ्यावा लागेल. स्पर्धेत सर्वाधिक धावा करणाऱ्या खेळाडूंत वॉर्नरचे स्थान आहे. शिखर धवनही चांगले योगदान देत आहे. मधल्या फळीत केन विलियम्सन, दीपक हुड्डा आणि यष्टिरक्षक नमन ओझा; तसेच स्थानिक खेळाडू युवराजसिंग यांच्यावर हैदराबादच्या विजयाची धुरा राहील. या संघाची गोलंदाजी प्रभावी ठरली. भुवनेश्वर, आशिष नेहरा, मुस्तफिजूर रहमान, बरिंदर सरन हे टिच्चून मारा करीत आहेत. पंजाबने अद्याप आयपीएलचे जेतेपद पटकाविलेले नाही. मुंबईवर चमकदार विजय नोंदविताच संघाकडून चाहत्यांच्या अपेक्षा वाढल्या; पण दुसरीकडे विजयापूर्वीच हा संघ वादाच्या भोवऱ्यात सापडला. आरसीबीकडून एका धावेने पराभूत झाल्यानंतर संघ व्यवस्थापनाचे कोचशी मतभेद झाल्याचे वृत्त पसरले. या सर्वांमध्ये कर्णधारपद आल्यानंतर मुरली विजयने चांगली कामगिरी केली. (वृत्तसंस्था)किंग्ज इलेव्हन पंजाब : डेव्हिड मिलर (कर्णधार), कायल अ‍ॅबोट, मोहित शर्मा, मिचेल जॉन्सन, ग्लेन मॅक्सवेल, मनन व्होरा, मुरली विजय, ऋषी धवन, शॉन मार्श, वृद्धिमान साहा, गुरकीरतसिंग मान, संदीप शर्मा, अक्षर पटेल, मार्क्स स्टोइनिस, अनुरितसिंग, शार्दूल ठाकूर, फरहान बेहार्डीन, के. सी. करिअप्पा, अरमान जाफर, प्रदीप साहू, स्वप्निल सिंग.सनरायझर्स हैदराबाद : शिखर धवन (कर्णधार), युवराजसिंग, आशिष नेहरा, डेव्हिड वॉर्नर, भुवनेश्वर कुमार, ट्रेंट बोल्ट, कर्ण शर्मा, इयान मॉर्गन, मुस्तफिजूर रहमान, आदित्य तरे, बरिंदर सरन, मोझेस हेन्रिक्स, केन विल्यमसन, नमन ओझा, अभिमन्यू मिथुन, आशिष रेड्डी, विपुल शर्मा, सिद्धार्थ कौल, रिकी भुई, बेन कटिंग, विनय शंकर व टी. सुमन.