ऑनलाइन लोकमत
{{#config.logo.enabled}}
{{/allowed}}नेल्सन, दि. १६ - वर्ल्डकपमध्ये जायंट किलर म्हणून ओळखल्या जाणा-या आयर्लंडने यंदाच्या वर्ल्डकपमध्ये वेस्ट इंडिजचा पराभव केला आहे. आयर्लंडने वेस्ट इंडिजचा चार गडी राखून पराभव केला असून आयर्लंडने ३०५ धावांचे लक्ष्य ४५.५ षटकांमध्येच गाठले.
वर्ल्डकपमध्ये सोमवारी वेस्ट इंडिज विरुद्ध आयर्लंड यांच्यात सामना पार पडला. आयर्लंडने नाणेफेक जिंकून प्रथम क्षेत्ररक्षणाचा निर्णय घेतला. वेस्ट इंडिजचे आघाडीचे फलंदाज स्वस्तात तंबूत परतल्याने वेस्ट इंडिजची अवस्था ५ बाद ८७ अशी झाली होती. यानंतर लेंडल सिमन्स (१०२ धावा) आणि डॅरेन सॅमीने (८९ धावा) या जोडीने वेस्ट इंडिजचा डाव फक्त सावरलाच नाही तर संघाला तीनशेचा टप्पाही गाठून दिला. त्यांना अँड्रे रसेलने नाबाद २८ धावांची खेळी करुन मोलाची साथ दिली. खराब सुरुवातीनंतरही वेस्ट इंडिजने ५० षटकांत सात गडी गमावून ३०४ धावा केल्या.
वेस्ट इंडिजने दिलेले ३०५ धावांचे लक्ष्य गाठण्यासाठी मैदानात उतरलेल्या आयर्लंडने चोख प्रत्युत्तर दिले. पहिल्या विकेटसाठी आयर्लंडचा कर्णधार विल्यम पोर्टफिल्ड आणि पॉल स्टर्लिंग यांनी संयमी खेळी करत संघाला अर्धशतकी सलामी दिली. आयर्लंडच्या ७१ धावा झाल्या असताना पोर्टफिल्ड बाद झाला. यानंतर स्टर्लिंग व एड जॉयस (८४ धावा) या जोडीने शतकी भागीदारी केली. स्टर्लिंगचे शतक अवघ्या आठ धावांनी हुकले. ९२ धावांवर असताना स्टर्लिंग सॅम्यूअल्सच्या गोलंदाजीवर झेलबाद झाला. जॉयस व नील ओब्रायनने धडाकेबाज खेळी करत यंदाच्या वर्ल्डकपमध्ये संघाला पहिला विजय मिळवून दिला. ओब्रायनने नाबाद ७९ धावांची खेळी केली. वेस्ट इंडिजने दिलेले ३०५ धावांचे लक्ष्य आयर्लंडने चार गडी आणि ४ षटकं शिल्लक असतानाच गाठले.
आयर्लंड संघ हा वर्ल्डकपमध्ये जायंट किलर म्हणून प्रसिद्ध असून सोमवारीही याचाच अनुभव आला. वेस्ट इंडिजच्या निष्प्रभ मा-याचा आयर्लंडने खरपूस समाचार घेत दिमाखदार विजय मिळवला. २०११ मध्ये आयर्लंडने इग्लंडचा तर त्यापूर्वीच्या वर्ल्डकपमध्ये पाकिस्तानचा पराभव करत सर्वांनाच आश्चर्याचा धक्का दिला होता.