Madison Keys wins Australian Open price money : अमेरिकेच्या मेडिसन कीजने अव्वल मानांकित बेलारूसची आर्यना सबालेंकाला पराभूत करत शनिवारी ऑस्ट्रेलियन ओपनटेनिसचा पहिला किताब जिंकला. सलग दोनवेळा ही स्पर्धा जिंकणाऱ्या सबालेंकाने यंदा तिसऱ्यांदा अंतिम फेरी गाठली हेती. पण मेडिसन कीजने तिला जेतेपदाच्या हॅट्रिकपासून वंचित ठेवले. कीजने कडवी झुंज देत गतविजेत्या सबालेंकावर ६-३, २-६, ७-५ असा विजय मिळवून ऑस्ट्रेलियन ओपनवर नाव कोरले.
अंतिम सामन्यातील पहिल्या सेटमध्ये सुरुवातीपासून २९ वर्षाच्या कीजने वर्चस्व गाजवले. तिने पहिल्या सेटमध्ये सहा गेम्स जिंकले व ६-३ ने विजय मिळवला. दुसऱ्या सेटमध्ये सबालेंकाने पुनरागमन केले व कीजचा ६-२ ने पराभव करून बरोबरी साधली. तिसऱ्या सेटमध्ये चुरशीचा सामना झाला. कीजने अंतिम गेम ७-५ असा जिंकून नवी विजेती होण्याचा मान मिळविला.
मेडिसन कीजने जिंकली मोठ्ठी रक्कम
ऑस्ट्रेलियन ओपन २०२५ च्या महिला एकेरीची अंतिम फेरी जिंकल्यानंतर मेडिसन कीज कोट्यवधींच्या बक्षिसाची मानकरी ठरली. यावेळी विजेत्याला ३५ लाख ऑस्ट्रेलियन डॉलर्स म्हणजेच सुमारे १९ कोटी रुपयांचे इनाम देण्यात आले.