लिपिकाच्या घरात २१ लाखांचे घबाड

रिक्षाचालकाकडून लाच घेताना अटक झालेल्या आरटीओचा लिपिक शैलेश पटेलच्या घराची झाडाझडती घेण्यात आली. त्याच्या घरामधून २ लाख ४० हजार रुपये किमतीच्या डॉलरसह

नवी मुंबई : रिक्षाचालकाकडून लाच घेताना अटक झालेल्या आरटीओचा लिपिक शैलेश पटेलच्या घराची झाडाझडती घेण्यात आली. त्याच्या घरामधून २ लाख ४० हजार रुपये किमतीच्या डॉलरसह एकूण २१ लाख ४० हजार ७०० रुपयांची मालमत्ता जप्त करण्यात आली आहे. नवी मुंबई उपप्रादेशिक कार्यालयामध्ये कार्यरत असणाऱ्या शैलेशकुमार पटेल व खाजगी एजंट बाळकृष्ण लांजेकर या दोघांना १ हजार रुपये लाच घेताना अटक केली होती. त्यांच्याविरोधात लाचलुचपत विभागाने एपीएमसी पोलीस स्टेशनमध्ये गुन्हा दाखल केला आहे. शैलेश पटेलच्या घराची शनिवारी झाडाझडती घेण्यात आली. त्याच्याकडे ९ लाख ९१ हजार रुपयांची रोख रक्कम सापडली आहे. ३ लाख ५६ हजार रुपये किमतीचे घर, १०० अमेरिकन डॉलरच्या ४० नोटा असा २ लाख ४० हजार रुपये, एक स्विफ्ट कार व घरातील एकूण साहित्याची किंमत ५ लाख ५३ हजार ७०० रुपये असा एकूण २१ लाख ४० हजार ७०० रुपयांचा ऐवज सापडला आहे. लाचलुचपत विभागाने सर्व रोख रक्कम व साहित्य जप्त केले आहे. अजून बेकायदेशीर संपत्ती आहे का, याची चौकशी केली जात असून याविषयी पुढील तपास सुरू असल्याची माहिती पोलीस उपअधीक्षक संजय मोहिते यांनी दिली आहे. (प्रतिनिधी)