बिबट्यानंतर आता लांडग्याची दहशत... तीन वर्षाच्या चिमुरड्याला उचलून नेलं; कुठे घडला प्रकार?

Wolf Attack on child: गेल्या काही दिवसांत विविध जंगली प्राणी मानवी वस्तीत घुसत असल्याच्या घटना घडत आहेत

Wolf Attack on child: सध्या महाराष्ट्रातील विविध जिल्ह्यात बिबट्याचा वावर दिसून येत आहे. बिबट्याने मानवी वस्तीत घुसून अनेकांवर हल्ला केल्याच्या घटना घडत आहेत. आतापर्यंत गाव-खेड्याकडे दिसणारा बिबट्या आता हळूहळू शहरांकडेही वाटचाल करत आहे. दोनच दिवसांपूर्वी मुंबईच्या जवळ भाईंदरध्ये बिबट्या बिल्डिंगमध्ये घुसल्याचे पाहायला मिळाले. मुंबई आणि महाराष्ट्रात हा प्रकार सुरू असतानाच उत्तर प्रदेशातील बहराइच जिल्ह्यात नरभक्षक लांडग्यांची दहशत वाढत आहे. 

सरकार, प्रशासन आणि वन विभागाकडून अनेक दावे करूनही लांडग्याचे निष्पाप मुलांवरील हल्ले थांबलेले नाहीत. ताजी घटना फखरपूर पोलिस स्टेशन हद्दीतील रसूलपूर गावात घडली. सोमवारी पहाटे एका नरभक्षक लांडग्याने एका तीन वर्षांच्या मुलाला त्याच्या आईवर हल्ला करून पळवून नेले. या भयानक घटनेने संपूर्ण गावात खळबळ उडाली आहे आणि रहिवासी प्रचंड हादरले आहेत.

मिळालेल्या वृत्तानुसार, रसूलपूर गावातील रहिवासी मनोहर यांचा तीन वर्षांचा मुलगा अंश त्यांच्या घराच्या अंगणात त्याच्या आईसोबत झोपला होता. पहाटे अंधाराचा फायदा घेत, एक लांडगा घरात घुसला आणि अचानक चिमुरड्यावर झडप घातली. मुलाच्या ओरडण्याने आईला जाग आली आणि तिने आरडाओरडा केला, पण तोपर्यंत लांडग्याने अंशला तोंडात पकडले आणि जवळच्या उसाच्या शेतात आणि झुडुपांमध्ये पळून गेला होता. जोपर्यंत ग्रामस्थ काठ्या घेऊन घटनास्थळी पोहोचले, तोपर्यंत लांडगा दिसेनासा झाला होता.

घटनेची माहिती मिळताच पोलिस आणि वन विभागाचे पथक घटनास्थळी पोहोचले. गावकऱ्यांच्या सहकार्याने सकाळपासून मोठ्या प्रमाणात शोध मोहीम सुरू आहे. ड्रोन कॅमेरे आणि थर्मल स्कॅनिंग वापरून शेतात, झुडुपे आणि आजूबाजूच्या परिसरात शोध घेतला जात आहे, परंतु अद्याप मुलाचा पत्ता लागलेला नाही. प्रकरणाचे गांभीर्य लक्षात घेता, डीएफओ राम सिंह स्वतः त्यांच्या पथकासह गावात तैनात आहेत. ते म्हणतात की घटनास्थळी सापडलेले पावलांचे ठसे आणि हल्ल्याची पद्धत जंगली लांडग्याची असल्याचे दिसते.

दरम्यान, ६ महिन्यांत १० हून अधिक मुलांनी लांडग्याच्या हल्ल्यात आपला जीव गमावला आहे.