Shocking News : उत्तर प्रदेशच्या मुझफ्फरनगरमधून एक धक्कादायक घटना समोर आली आहे. मुझफ्फरनगरच्या एका रुग्णालयात एक तरुण पुरुष म्हणून झोपलेला होता पण उटल्यानंतर त्याचे स्त्रीमध्ये रुपांतर झालं होतं. वैद्यकीय महाविद्यालयातील डॉक्टरांच्या संगनमताने एका व्यक्तीने आपल्याच एका मित्रावर त्याला न कळवता लिंग बदलण्याची शस्त्रक्रिया केली. ही घटना वाऱ्यासारखी सगळकडे पसरली. त्यानंतर आरोपी व्यक्ती आणि डॉक्टरवर कारवाई करण्याच्या मागणीसाठी भारतीय किसान युनियनचे कार्यकर्ते वैद्यकीय महाविद्यालयात बेमुदत संपावर बसले आहेत.
मुझफ्फरनगरमध्ये एका मित्राने आधी दुसऱ्या मित्रासोबत अनेक वर्षे व्यभिचार केला. त्यानंतर त्याला शस्त्रक्रियेच्या नावाखाली मेडिकल कॉलेजमध्ये दाखल केले, तिथे डॉक्टरांनी त्याचे लिंग बदलले. जेव्हा तरुण शुद्धीवर आला तेव्हा त्याचे रूपांतर मुलीत झाले होते. ही बाब भारतीय किसान युनियनला कळताच त्यांनीही तरुणाच्या कुटुंबीयांसह वैद्यकीय महाविद्यालय गाठले आणि आंदोलन करत गोंधळ घालण्यास सुरुवात केली. आरोपीसह डॉक्टरला अटक करण्याची आणि पीडित तरुणाला ५० लाख रुपयांची भरपाई देण्याची मागणी युनियने केली आहे.
मुझफ्फरनगर मन्सूरपूर पोलीस ठाण्याच्या हद्दीतील एका गावात हा सगळा प्रकार घडला. २० वर्षीय तरुण मुझफ्फरनगरमधील पेपर मिलमध्ये काम करायचा. याच मिलमध्ये शाहपूर पोलीस ठाण्यातील शोराम गावातील एक तरुण वीज फोरमन म्हणून काम करत होता. दोन वर्षांपूर्वी दोघांमध्ये मैत्री झाली आणि तेव्हापासून आरोपी तरुण पीडित तरुणावर व्यभिचार करत होता. त्यानंतर आरोपी तरुणाने पीडित तरुणाला रुग्णालयात दाखल करुन त्याच्यावर लिंग बदल शस्त्रक्रिया करुन घेतली.
पीडित तरुणाला बेशुद्ध करून त्याच्यावर शस्त्रक्रिया करण्यात आली. तरुण जेव्हा शुद्धीवर आला तेव्हा त्याचे रूपांतर मुलीत झाले होते. हा प्रकार लक्षात येताच त्याला जबर धक्का बसला. पीडित तरुणाच्या म्हणण्यानुसार, आरोपीने त्याला येथे आणले आणि दुसऱ्या दिवशी सकाळी ऑपरेशन झाले. ऑपरेशननंतर जेव्हा मला शुद्ध आली तेव्हा मी विचारले की ऑपरेशन कशासाठी आहे तेव्हा तो म्हणाला की ."मी तुला मुलापासून मुलगी बनवले आहे आणि आता तुला माझ्याबरोबर राहावे लागेल. आता ना तुझे नातेवाईक विचारणार ना समाजातील कोणी. मी वकील तयार केला आहे आणि तुम्हाला कोर्ट मॅरेज करावं लागेल."