आईच्या कुशीत झोपलेल्या चिमुकल्याला बिबट्या घेऊन गेला, गावात भीतीचे वातावरण...

Leopard Attack: पोलिस, वनविभाग, ग्रामस्थ सर्वांनी शोधले, गावाजवळ झाडात आढळला मृतदेह

Leopard Attack: उत्तर प्रदेशातील बलरामपूरमधून एक धक्कादायक घटना समोर आली आहे. रात्रीच्या अंधारात घरात घुसलेल्या बिबट्याने आईच्या कुशीत झोपलेल्या एका अडीच वर्षीय बालकाला खेचून नेले. या घटनेने परिसरात मोठी खळबळ उडाली. काही तासांच्या शोधानंतर अखेर मुलाचा मृतदेह गावापासून सुमारे 150 मीटर अंतरावर मिळाला. या घटनेनंतर गावात शोक आणि भीतीचे वातावरण निर्माण झाले आहे.

रात्री 2 वाजता घरात घुसला बिबट्या

मिळालेल्या माहितीनुसार, ही घटना नेवलगंज ग्राम पंचायतातील रेहारपुरवा (झौहना) या वसाहतीत शनिवारी उशिरा रात्री घडली. हरैया थाना क्षेत्रातील बरहवा ग्राम पंचायत, गुरदासपुरवा येथील चनावती नावाची महिला आपल्या एका नातेवाईकाकडे कौटुंबिक कार्यक्रमासाठी गेली होती. रात्री सुमारे 2 वाजता चनावती आपल्या अडीच वर्षांच्या रोहितला कुशीत घेऊन घरात झोपली होती. तेवढ्यात एक बिबट्या घरात शिरला अन् कुशीत झोपलेल्या रोहितला जबड्यात पकडले.

पोलिस, वन विभाग आणि ग्रामस्थांची संयुक्त शोधमोहीम

तेवढ्यात चनावतीला जाग आली आणि त्यांनी मुलाला बिबट्याच्या जबड्यात पाहून किंकाळ्या फोडल्या. घरातील इतर लोक जागे होईपर्यंत बिबट्या मुलाला घेऊन घराबाहेर पळून गेला. घटनेनंतर तात्काळ डायल 112 वर माहिती देण्यात आली. सूचना मिळताच पोलीस पथक आणि वन विभागाची टीम घटनास्थळी पोहोचली. ग्रामस्थांसह संयुक्तपणे शोधकार्य सुरू झाले. शोधादरम्यान, गावाच्या पश्चिमेला सुमारे 150 मीटर अंतरावर झाडात रोहितचा मृतदेह आढळला. मृतदेह मिळताच परिसरात आक्रोश पसरला.

गावकऱ्यांमध्ये भीतीचे वातावरण

घटनेनंतर संपूर्ण परिसरात प्रचंड भीतीचे वातावरण निर्माण झाले आहे. सोहेलवा वन्यजीव प्रभागातील या भागात बिबट्याच्या वाढत्या वावरामुळे वन विभागावर सुरक्षा वाढवण्याचा दबाव वाढला आहे.