Train engine derailment gaya : रेल्वे अपघाताच्या घटना चर्चेत असताना बिहारमध्ये ट्रेनचे इंजिन रेल्वे रुळावरून थेट शेतात जाऊन पोहोचल्याची घटना घडली आहे. या घटनेचा व्हिडीओ सोशल मीडियावर व्हायरल होत आहे. शुक्रवारी (१३ सप्टेंबर) दुपारी ही घटना घडली. सुदैवाने यात कोणतीही जीवित हानी झाली नाही.
बिहारमधील गया जिल्ह्यात ही घटना घडली आहे. रेल्वे इंजिन नियंत्रण सुटल्याने लूप लाईन ओलांडून पुढे निघून गेले.
मिळालेल्या माहितीनुसार, गया-किऊल रेल्वे मार्गावर असलेल्या वजिरगंज रेल्वे स्थानक आणि कोल्हाना थांब्याच्या दरम्यान ही घटना घडली. शुक्रवारी (१३ सप्टेंबर) रघुनाथपूर गावाजवळ रेल्वे इंजिन रेल्वे रूळावर पुढे जात असताना लूप लाईन क्रॉस करून शेतात घुसले.
गया जंक्शनकडे जात असताना घडली घटना
प्रत्यक्षदर्शींनी सांगितले की, लोको पायलट इंजिन लूप लाईनवरून गया जंक्शनच्या दिशेने घेऊ जात होता. त्याचवेळी इंजिनवरील नियंत्रण सुटले. इंजिन शेतात जात असताना आजूबाजूला असलेल्या लोकांनी याचा व्हिडीओ शूट केला.
गेल्या महिन्यात म्हणजे ऑगस्टमध्ये गया जिल्ह्यात कोळसा घेऊन जाणारी एक रेल्वे गाडी रुळावरून घसल्याची घटना घडली होती. मालगाडीचे आठ डब्बे रुळावरून घसरले होते. यात कोणतेही नुकसान झाले नाही.