सूड उगविण्यासाठी अभिनेत्रीनेच केले प्रवृत्त, अश्लील कमेंटमुळे दर्शन चिडला अन्..., धक्कादायक गौप्यस्फोट

Pavithra Gowda & Darshan: कन्नड चित्रपटसृष्टीतील आघाडीचा अभिनेता दर्शन, त्याची मैत्रीण व अभिनेत्री पवित्रा गौडा आणि त्याच्या इतर मित्रांवर अपमानास्पद टिप्पणी करणाऱ्या एका व्यक्तीच्या हत्येच्या तपासात धक्कादायक तपशील उघड झाले आहेत.

बंगळुरू (कर्नाटक) -  कन्नड चित्रपटसृष्टीतील आघाडीचा अभिनेता दर्शन, त्याची मैत्रीण व अभिनेत्री पवित्रा गौडा आणि त्याच्या इतर मित्रांवर अपमानास्पद टिप्पणी करणाऱ्या एका व्यक्तीच्या हत्येच्या तपासात धक्कादायक तपशील उघड झाले आहेत. पोलिस सूत्रांनी दिलेल्या माहितीनुसार, रेणुकास्वामी (वय ३३) याने सोशल मीडियावर अभिनेत्री पवित्रा हिच्यावर अश्लील टिप्पणी करून अभिनेता दर्शनचा राग वाढविला होता.

रेणुकास्वामीवर सूड उगविण्यासाठी पवित्रानेच दर्शन याला प्रवृत्त केले. त्यानुसार योजना तयार करण्यात आली होती. यासंदर्भात दर्शन फॅन क्लबचा चित्रदुर्ग शाखेचा निमंत्रक राघवेंद्र ऊर्फ रघू याच्याशी दर्शन याने संपर्क साधत, रेणुकास्वामी याच्याबद्दल माहिती मिळवली. रेणुकास्वामीची पत्नी सहाना हिने सांगितले की, राघवेंद्रने शुक्रवारी रात्री तिच्या पतीला त्यांच्या घराजवळून उचलले होते.

दर्शनने काय केले? 
- रेणुकास्वामीचे अपहरण करून त्याला बंगळुरूच्या कामाक्षीपल्या भागातील एका शेडमध्ये नेण्यात आले. तेथे दर्शनने त्याला बेल्टने मारहाण केली. तो बेशुद्ध झाल्यानंतर, दर्शनच्या फॅन क्लबच्या साथीदारांनी त्याला काठ्यांनी मारहाण केली. या मारहाणीत त्याचा मृत्यू झाला.
- त्याचा मृतदेह नंतर आरोपींनी नाल्यात फेकून दिला. पोलिस या प्रकरणाचा अधिक तपास करत असताना दोन आरोपींनी पोलिसांशी संपर्क साधला आणि आर्थिक वादातून रेणुकास्वामी यांची हत्या केल्याची कबुली दिली.