दक्षिणेतील सुपरस्टार अभिनेता विजय याने स्थापन केलेला टीव्हीके पक्ष तामिळनाडू विधानसभेची निवडणूक लढवणार असल्याने ही निवडणूक रंगतदार होण्याचे संकेत मिळत आहेत. दरम्यान, स्वबळावर निवडणूक लढवत असलेल्या टीव्हीकेने आज आपल्या उमेदवारांची यादी प्रसिद्ध केली असून, टीव्हीकेचा प्रमुख असलेला अभिनेता विजय हा दोन विधानसभा मतदारसंघातून निवडणूक लढवणार आहे.
तामिळनाडू विधानसभा निवडणुकीसाठी एनडीएमध्ये सहभागी होण्याच्या चर्चांना पूर्णविराम देत विजय याच्या पक्षाने स्वबळावर निवडणूक लढवण्याचा निर्णय घेतला होता. त्यानंतर आज टीव्हीके पक्षाने राज्यातील सर्व २३४ जागांवरील आपल्या उमेदवारांची यादी प्रसिद्ध केली आहे. टीव्हीकेचा प्रमुख विजय हा स्वत: त्रिची पूर्व आणि चेन्नईमधील परम्बूर विधानसभा मतदारसंघातून निवडणूक लढवणार आहे. विजयने दोन्ही मतदारसंघांमध्ये आपल्या नावाची नोंद सी. जोसेफ विजय असं नोंदवलं आहे.
याबरोबरच टीव्हीके पक्षाचे सरचिटणीस एन. आनंद हे टी. नगर येथून निवडणूक लढवणार आहेत. तर खजिनदार व्यंकट रमणन मायलापूर आणि आधव अर्जुन विल्लिवाक्कम येथून निवडणूक लढवणार आहे. त्याशिवाय गोबीचेट्टीपालयम येथून के. सेंगोट्टयान, तिरुचेंगोडे येथून के.जी. अरुणराज, तिरुपरनकुंडम येथून सीटीआर निर्मल कुमार, थावजंड लाइट्स येथून जेसीडी प्रभाकर, कोलाथूर येथून व्ही. एस. बाबू आणि आरकेनगर येथून डॉ. मारिया विल्सन यांना उमेदवारी देण्यात आली आहे.
उमेदवारांच्या घोषणेबरोबरच विजय याने तरुणांसाठी अनेक मोठमोठी आश्वासनने दिली आहेत. जर टीव्हीकेचं सरकार स्थापन झालं तर २९ वर्षांवरील वयाच्या बेरोजगार तरुणांना दरमहा ४ हजार रुपये दिले जातील. तसेच ज्यांना आतापर्यंत नोकरी मिळालेली नाही, अशा डिप्लोमाधारकांना आतापर्यंत नोकरी मिळालेली नाही, त्यांना दरमहा २ हजार ५०० रुपये देण्याचं आश्वासन देण्यात आलेलं आहे.
Web Summary : Actor Vijay's TVK party will contest Tamil Nadu elections independently. Vijay himself will contest from Trichy East and Perambur constituencies. TVK promises monthly allowances for unemployed youth and diploma holders if elected.
Web Summary : अभिनेता विजय की टीवीके पार्टी तमिलनाडु चुनाव स्वतंत्र रूप से लड़ेगी। विजय त्रिची पूर्व और पेरंबूर निर्वाचन क्षेत्रों से चुनाव लड़ेंगे। टीवीके ने बेरोजगार युवाओं और डिप्लोमा धारकों के लिए भत्ते का वादा किया है।