'दीड कोटी घे अन् पतीला माझ्या हवाली कर'; भोपाळमध्ये रंगला 'जुदाई' सिनेमासारखा रिअल ड्रामा!

एका सरकारी कर्मचाऱ्याच्या प्रेयसीने त्याच्या पत्नीला आणि मुलींना चक्क दीड कोटी रुपयांची मालमत्ता आणि रोख रक्कम देण्याचे मान्य केले आहे.

९० च्या दशकातील गाजलेला 'जुदाई' सिनेमा तुम्हाला आठवत असेलच, ज्यामध्ये पैशांसाठी पत्नी आपल्या पतीचा सौदा करते. अगदी तसाच काहीसा धक्कादायक प्रकार मध्य प्रदेशची राजधानी भोपाळमध्ये घडला आहे. एका सरकारी कर्मचाऱ्याच्या प्रेयसीने त्याच्या पत्नीला आणि मुलींना चक्क दीड कोटी रुपयांची मालमत्ता आणि रोख रक्कम देण्याचे मान्य केले आहे. या बदल्यात तिने आपल्या प्रेमीला स्वतःकडे ठेवण्याची अट घातली असून पत्नीनेही मुलांच्या भविष्यासाठी हा सौदा स्वीकारला आहे.

कार्यालयात जुळलं सूत, घरात पेटला विस्तव

या प्रकरणातील ४२ वर्षीय नायक एका सरकारी विभागात कामाला आहे. याच विभागात त्याच्यापेक्षा १० वर्षांनी मोठी असलेल्या एका महिला अधिकाऱ्याशी त्याचे सूत जुळले. हळूहळू या प्रेमप्रकरणाची कुणकुण घरी लागली आणि संसारत वादाची ठिणगी पडली. रोजच्या भांडणांचा त्रास त्यांच्या १६ आणि १२ वर्षांच्या मुलींना होऊ लागला. शेवटी, घरातील वातावरण इतके बिघडले की, मोठ्या मुलीनेच थेट फॅमिली कोर्टाचे दरवाजे ठोठावले.

पतीचा ठाम नकार, कोर्टात झाला ऐतिहासिक निकाल

फॅमिली कोर्टात कौन्सिलिंग दरम्यान पतीने स्पष्ट शब्दांत सांगितले की, त्याला आता पत्नीसोबत राहायचे नाही, तर आपल्या प्रेयसीसोबतच जीवन जगायचे आहे. गेल्या पाच वर्षांपासून हा वाद न्यायालयात सुरू होता. अखेर, मुलींचे भविष्य आणि स्वतःची आर्थिक सुरक्षितता पाहता पत्नीने एक अट ठेवली. तिने राहण्यासाठी एक आलिशान डुप्लेक्स बंगला आणि २७ लाख रुपये रोख, अशा एकूण दीड कोटींच्या मालमत्तेची मागणी केली.

प्रेयसीने क्षणात मानली अट!

सर्वांना धक्का बसला तो तेव्हा, जेव्हा पतीच्या प्रेयसीने ही अट कोणत्याही आढेवेढे न घेता मान्य केली. "मला माझा जोडीदार हवा आहे, त्यासाठी त्याच्या पहिल्या कुटुंबाला वारऱ्यावर सोडण्याची माझी इच्छा नाही," असे म्हणत तिने दीड कोटींचे पॅकेज देण्याची तयारी दर्शवली. आता हा पती आपल्या पहिल्या पत्नीला घटस्फोट देऊन प्रेयसीसोबत संसार थाटणार आहे.

लोभ नाही, तर मुलांची सुरक्षा महत्त्वाची!

'जुदाई' चित्रपटात नायिकेने हा सौदा केवळ पैशांच्या लालसेपोटी केला होता. मात्र, भोपाळच्या या प्रकरणात पत्नीने मुलींच्या उच्च शिक्षणासाठी आणि त्यांच्या सुरक्षित भविष्यासाठी या समझोत्यावर स्वाक्षरी केली आहे. भोपाळच्या फॅमिली कोर्टाच्या इतिहासातील ही पहिलीच अशी घटना आहे, जिथे प्रेयसीने आपल्या प्रेमासाठी एवढी मोठी किंमत मोजली आहे.