जयपूर - राजस्थानच्या चुरू येथे एका नर्सिंग महाविद्यालयात शिक्षण घेणाऱ्या युवतीने आत्महत्या केल्याची घटना घडली आहे. बीएससी नर्सिंगच्या तिसऱ्या वर्षाला शिकणाऱ्या या मुलीने आत्महत्येपूर्वी सुसाईड नोट लिहून ठेवली असून त्यामध्ये आई-वडिलांना आय लव्ह यू म्हटलं आहे. या भावनिक सुसाईड नोट आणि मुलीने अचानक उचललेल्या टोकाच्या पावलामुळे कुटुंबीयांना मोठा धक्का बसला आहे. प्रियंका कटेवा असे या तरुणीचे नाव असून ती २२ वर्षांची होती. प्रियंकाच्या भावनिक सुसाईड नोटमुळे पोलिसांचे डोळे पाणावले होते.
मी या जगदुनियेला परेशान झाले होते, ही दुनिया खूप स्वार्थी आहे. तुम्ही कितीही चागंलं वागा, पण लोक ते समजणार नाहीत. लहानपणी ज्याप्रमाणे माझ्या चुकांना माफी दिली, तशीचा या चुकीलाही माफ करा. जगात आई-वडिलांसारखं प्रेम दुसरं कोणीचा करू शकत नाही. आय लव्ह यू मम्मी-पापा, अँड माय ऑल फॅमिली... कुछ तो लोग कहेंगे, लोगों का काम है कहना... अशी भावनिक चिठ्ठी लिहून प्रियंकाने आत्महत्या केली.
झुंझूनुची रहिवाशी असलेली प्रियंका इंद्रा मार्केटमध्ये एका खोलीत भाड्याने राहात होती. रविवारी सकाळी खूप वेळ झाला तरी ती रुममधून बाहेर आली नाही. घरमालकाने दरवाजा वाजवून पाहिलं पण आतमधून काहीच आवाज आला नाही. त्यामुळे, खिडकीतून डोकावून पाहिले असता तिचे शरीर एका दोरीला लटकल्याचे दिसल्याने सर्वांनाच मोठा धक्का बसला. याबाबत, घरमालकाने पोलिसांना खबर दिली. त्यानंतर, काही वेळातच पोलीस घटनास्थळी दाखल झाले. मृतदेह शवविच्छेदनासाठी पाठविण्यात आला.
दरम्यान, शनिवारी बीएससी नर्सींगच्या सेकंड इयरचा निकाल लागला होता. संध्याकाळी प्रियंकाने आई-वडिलांसह नातेवाईकांशी फोनवरुन संवादही साधला. त्यानंतर, नेमकं काय झालं हे कुणालाच माहिती नाही. प्रियंकांच्या आत्महत्येमुळे कुटुंबीयांवर दु:खाचा डोंगर कोसळला असून पोलीस तपास करत आहेत.