धक्कादायक! पतीनं लग्नाच्या वाढदिवशी गिफ्ट दिलं नाही; नाराज पत्नीनं चाकूनं केले वार

लग्नाच्या वाढदिवशी पतीनं गिफ्ट न दिल्यानं संतापलेल्या पत्नीनं त्याच्यावर चाकूने वार केले.

सोशल मीडियाच्या जगात कोणतीच गोष्ट लपून राहू शकत नाही. अनेकदा प्रसिद्धीसाठी तरूणाई भन्नाट व्हिडीओ बनवत असते. सोशल मीडियाच्या माध्यमातून त्यांना प्रसिद्धीही मिळते. नेहमी सोशल मीडियावर काही ना काही अनोख्या घटना समोर येत असतात. आता अशीच एक अनोखी अन् धक्कादायक घटना समोर आली आहे. लग्नाच्या वाढदिवशी पतीनं गिफ्ट न दिल्यानं संतापलेल्या पत्नीनं त्याच्यावर चाकूनं वार केले. बंगळुरूतील या धक्कादायक घटनेची सर्वत्र चर्चा रंगली आहे. 

खरं तर झालं असं की, लग्नाच्या वाढदिवशी पतीनं कोणतीही भेट न दिल्यानं संतप्त झालेल्या पत्नीनं पतीवर हल्ला केला. तो झोपला असता तिनं त्याच्यावर चाकूनं वार केले. बंगळुरूतील बेलांदूर पोलीस ठाण्यात हत्येचा प्रयत्न केल्याचा गुन्हा दाखल करण्यात आला आहे. संबंधित जखमी पती किरण (नाव बदलले आहे) हा एका खासगी कंपनीतील कर्मचारी आहे. त्याचे वय ३७ वर्ष असून त्याची पत्नी ३५ वर्षीय संध्याने (नाव बदलले आहे) माणुसकीला काळीमा फासणारी घटना घडवून आणली. 

पोलिसांत गुन्हा दाखल 

किरणने पोलिसांना सांगितले की, २७ फेब्रुवारी रोजी रात्री १.३० वाजता गाढ झोपेत असताना संध्याने स्वयंपाकघरातील चाकू घेऊन त्याच्या हातावर वार केले. रुग्णालयाकडून वैद्यकीय कायदेशीर प्रकरणाचा अहवाल मिळाल्यानंतर बेलंदूर पोलिसांनी १ मार्च रोजी संध्याविरुद्ध गुन्हा नोंदवला. पोलिसांनी या जोडप्याला काही वेळ खासगीत चर्चा करण्यास आणि या समस्येचे निराकरण करण्यासाठी परवानगी दिली होती. 

पोलिसांनी दिलेल्या माहितीनुसार, २७ फेब्रुवारीच्या पहाटे ही घटना घडली. लग्नाच्या वाढदिवशी पतीनं कोणतेही गिफ्ट न दिल्यानं नाराज होऊन पत्नीनं किरणवर किचनमधील चाकूनं वार केले. किरणच्या आजोबांचे नुकतेच निधन झाल्यामुळे त्यानं लग्नाचा वाढदिवस साजरा करण्यामध्ये रस घेतला नाही. सुदैवानं संध्यानं केलेला हल्ला रोखण्यात किरणला यश आलं. त्याच्या हाताला दुखापत झाली पण  शेजाऱ्यांच्या मदतीनं त्यानं वैद्यकीय मदत घेतली, ज्यामुळे पोलिसांनाही माहिती मिळाली.