काँग्रेसचे नेते आणि लोकसभेतील विरोधी पक्षनेते राहुल गांधी यांच्याविरोधात संसदेतील प्रवेशद्वारावर झालेल्या धक्काबुक्कीप्रकरणी दाखल एफआयआरचा तपास आता क्राईम ब्रँचकडून करण्यात येणार आहे. संसदेच्या प्रवेशद्वारावर झालेल्या धक्काबुक्की प्रकरणी भाजपाच्या काही खासदारांनी राहुल गांधी यांच्याविरोधात तक्रार दाखल केली होती. दिल्ली पोलिसांनी या प्रकरणाचा तपास क्राईम ब्रँचकडे सोपवल्याची माहिती एका अधिकाऱ्याने दिली आहे.
संसदेच्या प्रवेशद्वारावर झालेल्या धक्काबुक्की प्रकरणी दिल्ली पोलिसांनी राहुल गांधी यांच्याविरोधात एफआयआर दाखल केली होती. संसद मार्ग पोलीस ठाण्यामध्ये राहुल गांधींविरोधात भादंवि कलम ११५ (जाणीवपूर्वक दुखापत करणं), १२५ (इतरांचं जीवित किंवा सुरक्षेला धोका उत्पन्न करणारे कृत्य करणे), १३१, ३५१ आणि ३(५) अन्वये गुन्हा दाखल करण्यात आला होता. आता या प्रकरणाचा तपास क्राईम ब्रँचकडून करण्यात येईल, असे या अधिकाऱ्याने सांगितले.
भाजपाच्या नेत्यांनी पोलिसांकडे दिलेल्या तक्रारीनंतर काही तासांतच राहुल गांधी यांच्याविरोधात हा गुन्हा दाखल करण्यात आला होता. भाजपा नेत्यांनी दिलेल्या तक्रारीमध्ये राहुल गांधींवर धक्काबुक्कीदरम्यान हल्ला करण्यासाठी चिथावणी देण्याचा आरोप राहुल गांधींवर करण्यात आला होता. संसदेच्या प्रवेशद्वारावर झालेल्या या धक्काबुक्कीमध्ये भाजपाचे प्रतापचंद्र सारंगी आणि मुकेश राजपूत हे जखमी झाले होते. पोलिसांच्या सूत्रांनी दिलेल्या माहितीनुसार अधिकाऱ्यांकडून राहुल गांधी यांना चौकशीसाठी बोलावलं जाऊ शकतं. तसेच सा प्रकरणात इतर खासदारांचे जाबबही नोंदवले जाऊ शकतात.