प्रेम हे आंधळ असतं असं बोलतात, आपलं प्रेम मिळवण्यासाठी अनेकजण काहीही करतात. पण, जर प्रेमात धोका मिळाला तरीही काहीजण बदला घेत असतात. अशीच एक घटना चेन्नईतून समोर आली आहे. येथे एका तरुणीने बदला घेण्यासाठी मोठीच शक्कल लढवली. तरुणीच्या या कारमानामुळे एका राज्यातील नाहीतर तब्बल १२ राज्यातील पोलिस कामाला लागले. फक्त पोलिसच नाहीतर गुप्तचर यंत्रणा सुद्धा कामाला लागल्या होत्या. तरुणीने तरुणाच्या नावाच्या बऱ्याच ईमेल आयडी तयार केल्या. या आयडीवरुन या तरुणीने अहमदाबादच्या नरेंद्र मोदी स्टेडियमसह १२ राज्यात २१ पेक्षा जास्त वेळा बॉम्बच्या खोट्या धमक्या दिल्या. या प्रकरणी पोलिसांनी तरुणीला चेन्नईमधून अटक केली आहे.
पोलिसांनी चेन्नईतील रेने जोसिल्डा या तरुणीला अटक केली. ती रोबोटिक्समध्ये प्रशिक्षित अभियंता आहे आणि चेन्नईच्या एका बहुराष्ट्रीय कंपनीत उच्च पदावर काम करते. काही दिवसापूर्वी एअर इंडियाचे विमान कोसळल्यानंतर, तिने तिच्या प्रियकराच्या नावाने एक ईमेल पाठवला, यामध्ये एअर इंडियाचे विमान मीच क्रॅश केल्याचा दावा केला.
नेमकं प्रकरण काय?
पोलिसांनी दिलेल्या माहितीनुसार, तरुणीचे तिचा सहकारी दिविज प्रभाकरशी एकतर्फी प्रेम झाले, पण, फेब्रुवारीमध्ये प्रभाकरने दुसऱ्याच तरुणीसोबत लग्न केले, त्यानंतर रेने हिने बदला घ्यायचं ठरवलं. तिने प्रभाकरच्या नावाने अनेक ईमेल तयार केले आणि त्यांच्याकडून बनावट बॉम्ब धमकीचे ईमेल पाठवू लागली. तरुणी तांत्रिकदृष्ट्या हुशार असल्याने, तिने पोलिसांपासून वाचण्यासाठी डार्क वेब आणि व्हर्च्युअल आयडीचा चांगला वापर केला. शेवटी पोलिसांनी तिला शोधून काढले.
एअर इंडिया क्रॅश केल्याचा दावा
अहमदाबाद विमान अपघातानंतर, जेव्हा बी.जे. मेडिकल कॉलेजमध्ये गोंधळ उडाला होता, तेव्हा रेनेने कॉलेजला एक ईमेल पाठवला होता. यामध्ये म्हटले होते की, आता तुम्हाला शक्ती समजली असेलच. काल ज्याप्रमाणे ईमेल पाठवण्यात आला होता, त्याचप्रमाणे आज एअर इंडियाचे विमान कोसळले. मला माहित आहे की पोलिसांनी तो खोटी धमकी समजून त्याकडे दुर्लक्ष केले असेल. आम्ही खेळ खेळत नाही.
या तरुणीने दिल्ली, पंजाब, बिहार, महाराष्ट्र, राजस्थान, तामिळनाडू, कर्नाटक, केरळ, तेलंगणा, मध्य प्रदेश, गुजरात आणि हरयाणा येथील वेगवेगळ्या ईमेल आयडीवरून बनावट बॉम्ब धमक्या पाठवल्या. हे सर्व ईमेल मे ते जून २०२५ दरम्यान पाठवण्यात आले होते.