आंध्र प्रदेशातील गुंटूर जिल्ह्यात वायएसआर काँग्रेस पक्षाच्या रॅलीत एका कारने ५५ वर्षीय व्यक्तीला चिरडले. त्या व्यक्तीच्या मृत्यूनंतर चार दिवसांनी एक धक्कादायक व्हिडिओही समोर आला. व्हिडिओमध्ये, त्या व्यक्तीला एका कारखाली चिरडले जात असल्याचे दिसून येते या कारमध्ये माजी मुख्यमंत्री वायएस जगन मोहन रेड्डी स्वतः बसले होते. या प्रकरणी आता आणखी एक अपडेट समोर आली आहे. रेड्डी यांच्यावर या अपघात प्रकरणी गुन्हा दाखल करण्यात आला आहे.
माजी मुख्यमंत्री जगन मोहन रेड्डी बुधवार, १८ जून रोजी पालनाडू जिल्ह्यातील ताडेपल्ली ते रेंटपल्ला येथे रॅलीत उपस्थित होते. वायएसआरसीपीच्या एका पदाधिकाऱ्याने पोलिसांच्या त्रासाला कंटाळून आत्महत्या केल्याचा आरोप आहे. या कार्यकर्त्यांच्या कुटुंबीयांना भेटण्यासाठी रेड्डी आले होते. यावेळी शहरात रॅली काढण्यात आली. या रॅलीवेळी माजी मुख्यमंत्री रेड्डी यांच्या कारखाली चिरडून एका कार्यकर्त्यांचा मृत्यू झाला.
विविध पुराव्यांचे विश्लेषण केल्यानंतर, मृत व्यक्ती माजी मुख्यमंत्री रेड्डी यांच्या वाहनाच्या चाकाखाली असल्याचे आढळून आले," असे गुंटूर जिल्हा पोलिस अधीक्षक एस सतीश कुमार यांनी रविवारी रात्री पत्रकार परिषदेत सांगितले.
पोलिसांनी सांगितले की, सिंगैया नावाच्या वृद्ध व्यक्तीला गंभीर रक्तस्त्राव झाल्याची माहिती मिळाल्यानंतर त्यांना रुग्णालयात दाखल केले पण डॉक्टरांनी त्यांना मृत घोषित केले. स्थानिक पोलिस ठाण्यात त्यांची पत्नी चिली लुर्धू मेरी यांनी दिलेल्या तक्रारीवरून सुरुवातीला बीएनएसच्या कलम १०६(१ अंतर्गत गुन्हा दाखल करण्यात आला.
सीसीटीव्ही झाला व्हायरल
या घटनेचा सीसीसी फुटेज आणि ड्रोन फुटेज समोर आल्यानंतर त्याचे विश्लेषण झाले. यानंतर, पोलिसांना हा अपघात जगन मोहन रेड्डी यांच्या ताफ्यातील कारखाली चिरडून अपघात झाल्याचे समोर आले.
यानंतर पोलिसांनी प्रकरणात कलमामध्ये बदल करुन कलम १०५ लावले. या प्रकरणी आणखी तपास सुरू आहे. इतर आरोपींमध्ये जगन मोहन रेड्डी यांचे ड्रायव्हर रमणा रेड्डी, वैयक्तिक सहाय्यक के नागेश्वर रेड्डी, वरिष्ठ वायएसआरसीपी नेते वायव्ही सुब्बारेड्डी, माजी आमदार पेरणी वेंकटरमैया आणि माजी मंत्री विदादला रजनी यांचा समावेश आहे, अशी माहिती पोलिसांनी दिली.