भीषण अपघात! ओडिशात ट्रेलरच्या धडकेत ५ पोलिसांचा जागीच मृत्यू, ३ जखमी; गाडीचा चक्काचूर

ओडिशातून एक अत्यंत हृदयद्रावक घटना समोर आली आहे. भीषण अपघातात ५ पोलीस कर्मचाऱ्यांचा जागीच मृत्यू झाला आहे. नॅशनल हायवे ४९ वर झारसुगुडा सदर पोलीस स्टेशनजवळ भरधाव ट्रेलरने पोलिसांच्या गाडीला जोरदार धडक दिली. अपघाताच्या वेळी गाडीत एकूण ८ पोलीस कर्मचारी होते. यापैकी ५ जणांचा जागीच मृत्यू झाला, तर अन्य ३ जण गंभीर जखमी झाले आहेत. जखमींना तातडीने जवळच्या रुग्णालयात दाखल करण्यात आलं असून त्यांच्यावर उपचार सुरू आहेत.

ही धडक इतकी भीषण होती की पोलिसांच्या गाडीचा अक्षरशः चक्काचूर झाला आहे. या घटनेचा व्हिडिओही समोर आला आहे. झारसुगुडाचे पोलीस अधीक्षक (SP) गुंडाला रेड्डी राघवेंद्र यांनी दिलेल्या माहितीनुसार, हे सर्व पोलीस कर्मचारी एका विवाह समारंभातून परतत होते. 

जिल्हाधिकारी चव्हाण कुणाल मोतीराम यांनी या घटनेवर शोक व्यक्त करत म्हटलं की, "झारसुगुडा येथे आज एक दुर्दैवी घटना घडली असून यात आम्ही ५ पोलीस कर्मचारी गमावले आहेत. हा अपघात नेमका कशामुळे झाला याची चौकशी केली जाईल आणि भविष्यात अशा घटना टाळण्यासाठी आवश्यक पावले उचलली जातील."

या भीषण अपघातानंतर ओडिशाचे मुख्यमंत्री मोहन चरण माझी यांनी ट्विट करत श्रद्धांजली वाहिली आहे. "झारसुगुडा येथील दुर्दैवी रस्ते अपघातात कर्तव्यावर असलेल्या ५ पोलीस अधिकाऱ्यांच्या अकाली निधनाची बातमी ऐकून मला खूप दुःख झालं आहे. या कठीण काळात शोकग्रस्त कुटुंबांप्रती मी माझ्या संवेदना व्यक्त करतो. ईश्वर त्यांच्या आत्म्यास शांती देवो आणि अपघातात जखमी झालेले कर्मचारी लवकर बरे व्हावेत, अशी मी प्रार्थना करतो" असं म्हटलं आहे.