वैमानिकांच्या नव्या वेळापत्रकाला स्थगिती; मनुष्यबळ कमतरतेमुळे डीजीसीएचा निर्णय

नव्या वेळापत्रकाची अंमलबजावणी केली तर दैनंदिन विमान सेवांसाठी वैमानिकांची संख्या आणखी कमी होणार आहे. 

लोकमत न्यूज नेटवर्क, मुंबई: इराण-अमेरिका संघर्षामुळे युरोप आणि अमेरिकेला जाणाऱ्या विमानांना लांबचा पल्ला पडत असल्यामुळे वैमानिकांवर येणारा ताण लक्षात घेता नागरी विमान वाहतूक महासंचालनालयाने (डीजीसीए) नव्या वेळापत्रकाच्या अंमलबजावणीला ३० एप्रिलपर्यंत स्थगिती दिली आहे.

काही महिन्यांपासून देशांतर्गत मार्गांवर तसेच आंतरराष्ट्रीय मार्गांवरील विमान वाहतुकीमध्ये मोठ्या प्रमाणावर वाढ झाली आहे. त्या तुलनेत वैमानिक आणि केबिन कर्मचाऱ्यांची संख्या मात्र कमी आहे. त्यात नव्या वेळापत्रकाची अंमलबजावणी केली तर दैनंदिन विमान सेवांसाठी वैमानिकांची संख्या आणखी कमी होणार आहे. 

त्यातच गेल्या महिनाभरापासून युद्ध सुरू असल्याने युरोप आणि अमेरिकेसाठी भारतीय विमान कंपन्यांना लांबच्या हवाई मार्गावरून प्रवास करावा लागत आहे. अशा स्थितीत नव्या वेळापत्रकाची अंमलबजावणी करणे शक्य नसल्याचा पवित्रा विमान कंपन्यांनी घेतला आहे. अखेर, कंपन्यांची परिस्थिती लक्षात घेत डीजीसीएने या नव्या वेळापत्रकाला तात्पुरती स्थगिती दिली आहे.