बिहारमधील मुझफ्फरपूरमध्ये एक मोठी दुर्घटना घडली आहे. येथील मुलांना शाळेत घेऊन जाणारी बोट उलटली. या घटनेनंतर १८ मुले बेपत्ता झाली आहेत. या बोटीत ३४ मुले होती. एनडीआरएफच्या टीमला घटनास्थळी पाचारण करण्यात आले आहे.
मिळालेल्या माहितीनुसार, ही घटना गायघाट पोलीस ठाण्याच्या हद्दीत बागमती नदीत घडली. भटगामा मधुरपट्टी येथील पीपळ घाटातून मुले शाळेत जात असताना ही दुर्घटना झाल्याचे सांगण्यात येत आहे. तसेच, या घटनेनंतर स्थानिक नागरिकांच्या मदतीने प्रशासनाने बचाव कार्य सुरू आहे. अनेक मुलांना बाहेर काढले आहे, पण अजूनही काही मुले बेपत्ता आहेत.
घटनेनंतर परिसरात एकच गोंधळ उडाला आहे. घटनास्थळी लोकांची मोठी गर्दी जमली आहे. नदीत पाण्याचा जोरदार प्रवाह असल्याने बचाव कार्य करताना अडचणी येत आहेत. याशिवाय, या घटनेनंतर स्थानिकांमध्ये संतापाचे वातावरण आहे. वर्षानुवर्षे नदीवर पूल बांधण्याची मागणी करत आहोत, मात्र त्यांची मागणी मान्य न झाल्याने ही दुर्घटना घडल्याचे त्यांचे म्हणणे आहे. या बोटीत लहान मुलांसह काही महिलाही होत्या, असे सांगण्यात येत आहे.