गुरुग्राम - तिसरी मुलगी झाल्याने चिडलेल्या महिलेने आपल्याच एक महिन्याच्या चिमुरडीची गळा दाबून हत्या केल्याची धक्कादायक घटना समोर आली आहे. मुलीची हत्या केल्यानंतर महिलेने स्वत: गळफास लावून आत्महत्या केली. ही घटना राजेंद्र पार्क पोलीस स्टेशन अंतर्गत असणा-या चंदू गावातील आहे. मृत महिलेच्या वडिलांनी केलेल्या तक्रारीच्या आधारे राजेंद्र पार्क पोलिसांनी महिलेविरोधात हत्येचा गुन्हा दाखल केला आहे.
पोलिसांकडून मिळालेल्या माहितीनुसार, मृत महिलेचे वडिल जगदीश यादव यांनी पोलिसांकडे जबाब नोंदवला आहे. जगदीश यांनी सांगितलं आहे की, त्यांच्या मुलीचं 27 फेब्रुवारी 2009 मध्ये मनमोहन उर्फ मोनू याच्यासोबत लग्न झालं होतं. मनमोहन याचं गावात भाजीपाल्याचं दुकान आहे. लग्नानंतर सलग तीन मुली जन्माला आल्या होत्या. एक महिन्यांपुर्वीच तिस-या मुलीचा जन्म झाला होता.
तिसरी मुलगी झाल्यानंतर आपली मुलगी प्रचंड तणावात गेली होती अशी माहिती जगदीश यांनी दिली आहे. गुरुवारी सकाळी मुलीच्या सास-यांनी फोन करुन तिने मुलीची गळा दाबून हत्या केल्यानंतर आत्महत्या केल्याचं मला कळवलं असं जगदीश यांचं म्हणणं आहे. माहिती मिळाल्यानंतर पोलीस घटनास्थळी पोहोचले. मृत महिलेच्या वडिलांनी केलेल्या तक्रारीनंतर पोलिसांनी हत्येच्या आरोपाखाली एफआयआर नोंदवला आहे. पोस्टमॉर्टम केल्यानंतर मृतदेह नातेवाईकांकडे सोपवण्यात येतील असं पोलिसांनी सांगितलं आहे.